Siami'n India chakpui leh ta

Bangkok-a 4th Women’s U18 Asia Cup khelh mekah India tan Lalremsiami a par vul zel. Thawhṭanni tlai khan India hian an group match hnuhnung berah Malaysia 3-1 in an hneh a, goal thumna khungtu chu Siami niin India hian Asia khawlmual hockey inelna semifinal an lut.

India hian an match hnuhnung zawkah Chi-na 3-2 in an lo hneh tawh a, Malaysia lakah pawh inrintawkna an nei sang hle. Manpreet Kaur leh Poonam te goal hmangin 2-0 in hma an hruai nghal. Malaysia hian Nuramirah Shakirah hmangin si khat sut ve mah se Chi--na lakah goal hnih khungtu Siami chuan an chak nemnghehna goal a khung.

India midfielder Lal-remsiami chuan, "Ram tana ka inkhelh theih chhan chu Pathian mi hruaina vang a ni a, kan inkhelh leh zel turah ṭha taka ka khelh zel theih nana min lo ṭawngṭai pui turin Mizo mipuite ka sawm," tiin Vanglaini palai a hrilh.