Damchhung atan FIFA hruaitu hrem

December 2015-a Zurich khawpuia FIFA hruaitu 16 man zinga mi Rafael Callejas leh Alfredo Hawit te chu football khawvela thu-neitu sang ber FIFA chuan damchhunga football kaihhnawiha inhnamhnawih thei tawh lo turin an hrem.

FIFA ethics com-mittee thupuangtu chuan Honduras ram mi leh sa pahnihte hian World Cup qualifying commercial rights hralh chungchangah marketing company ṭhen-khat hnen aṭangin thamna sum tam tham tak an dawng niin an tarlang.

Rafael Callejas hi kum 1990-94 inkar khan Honduras Football Association president a ni a, nikuma man a nihlai khan FIFA marketing and TV committee member a ni. Hawit hi FIFA vice-president hlui niin man a nih lai khan North America, Central America and the Caribbean te inchhun khawmna CONCACAF-ah hruaitu a ni.

USA thubuai nei mek Callejas hi January 27-ah court chuan a hremna a ti chhuak dawn a, Hawit hremna hi March 24-ah a hriat theih ang.