Uaiin ṭha mi Zlatan Ibrahimovic

Manchester United striker Zla-tan Ibrahimovic chuan uaiin ṭha mi ang mai a nih thu sawiin kum 50 thleng pawh inkhel thei turah a inngai! Kum 35-a upa striker hian nipui transfer bazar-ah khan Paris Saint-Germain aṭangin United hi free transfer-in a zawm a, league match 16-ah goal 11 khungin inelna hrang hranga match 25 a inlanah goal 16 a khung leh der tawh!

Old Trafford-a pan tirha mi tam takin talbuai tura an sawi striker chuan, "Uaiin ṭha mi ang maiin ka upat poh leh ka ṭha tulh tulh mai a ni. Uaiin tui ṭha tak in ngaina a nih chuan chu in thil ngainat chu keimah khaikhin nana thil ṭha ber a ni," a ti.

Swede striker chuan sawi chhun--zawmin, "Premier League-ah ka in-siamrem thuai a, ka hlim a, nuam ka ti em em a ni. Kum 35 ni tawh mah ila ka ngaihtuahnaah chuan kum 20 chauh ka la ni a, kum 50 ka tlin thleng pawn inkhel thei turah hial ka inngai a ni. Hmun hrang hrangah inkhelin ka awm kual tawh a, khawiahmah buaina ka la nei ngai lo," tiin Netherlands, Italy, Spain leh France-a khel tawh striker chuan a sawi.

Season hmasaa PSG tan match 51 a inlana goal 50 khungtu striker hian Inrinni khan an league match hnuhnung bera West Brom an hnehna inkhelah goal hnih a khung a, Baggies keeper Ben Foster-a'n a dah sang hle.

United keeper hlui chuan, "Kum 35-a upa a ni tawh tih hi ka awih lo hial zawk a ni. Boruak sangah a hlauhawm em em a, leiah a hlauhawm em em tho a, tharum a ngah em em bawk. Milian satliah tan a hnathawh ang tam tak hi thawh theih a ni lo," tiin striker ropui chu a fak.