Australian Open Simona Halep-i'n quarterfinal a lut

Australian Open seeded number 4 Simona Halep chuan nimin khan semifinalist hlui Elise Mertens chu 6-4, 6-4 a hnehin semifinal a lut.

World number 3 Halep hian Belgian nula seeded number 16 Mertens hneh turin hna harsatna hranpa a tawk lo. Halep hian nikum February khan Qatar Total Open-ah Mertens hi a hneh tawh lo a, amaherawhchu tun ṭuma hnehna a chan avangin Australian Open-ah a vawi li nan quarterfinal a lut. 

Kum 28 mi Romanian player Halep hian January 29, Nilaini hian Iga Swiatek hnehtu Anett Kontaveit (28) a hmachhawn dawn. Halep chuan, "Kan inkhelh tawhna kha rilruah a awm reng a, ka chak lo thei tih hriain ball zawng zawngah rilru ka pe a ni," tiin a sawi.

Nimin inkhel dangah seeded number 30-na Anastasia Pavlyu-chenkova chuan amah aia seeded sang Angelique Kerber (17) a hneh a, Russian nula hian seeded number 2 Katarina Pliskova a hneh tawh bawk. Pavlyuchenkova hian Kiki Bertens hnehtu Garbine Muguruza a hmachhawn zui dawn.

Tukin zing aṭangin quarterfinal khelh ṭan a ni dawn a, Arab hmeichhe zinga Australian Open singles quarterfinal lut hmasa ber Ons Jabeur-i'n seeded number 14 Sofia Kenin a hmachhawn dawn. Dar 7-ah seeded number 1 Ashleigh Barty leh seeded number 7 Petra Kvitová te an inkhel zui ang.