Flamengo-in Filipe Luis an ban!

Chelsea defender hlui Filipe Luis chu a club enkawl Flamengo 8-0 a a chakpui hnu lawkah ban a ni a, Brazilian club hian an coach hlawhtling tak hi eng vanga ban thut nge an nih pawh chiang taka sawi an nei chuang lo!

Kum 40 mi Luis hi Flamengo-ah a hlawhtling hle a, 8-0 a a team a chakpuina inkhel chhiar tel lohin Brazilian club hi match 100 a enkawl hman a, nomawi pasarih ngawt lakpui hmanin, match 14 dana champion ziah ang a ni.

Mahse, Brazilian coach a him phah lo a, ban a ni ta tho. Flamengo chuan, "Filipe Luis hian kan team a enkawl tawh dawn lo a, a rual hian Ivan Palanco (assistant coach) leh Diogo Linhares (physical trainer) pawh an chhuak nghal a ni.

"Flamengo chuan kan player hlui leh coach Filipe Luis-a chungah lawmthu a sawi a, a hma hun lo awm zel tur atan duhsakna sang ber kan hlan a ni," an ti.

Kum 2015-a Jose Mourinho enkawlna hnuaia Chelsea tana Premier League nomawi chawitu Filipe Luis hi ban ni mah se, hna a van dawn lo a, European football-ah pawh kan hmu har kher lo ang.

Luis hian Flamengo hi September 2024 khan enkawl ṭanin, Copa Libertadores, Serie A, Copa do Brasil, Supercopa do Brasil, Campeonato Carioca, Fifa Challenger Cup leh FIFA Derby of the Americas-ah te nomawi a chawipui.

Nimin khan Rio de Janeiro state league Campeonato Carioca semifinal second leg-ah Maureira chu 8-0 a sawpin, inkhel hmasa nen, 11-0 in an tlang a, final an lut. Mahse, final an luh hnu lawkah ban a ni ta si a, nomawi a chawi belh ta lo.

Kum 2025-a South American Champions League Copa Libertadores-a Flamengo a champion pui khan, player leh coach ni chunga he nomawi chawi kawp thei pakuana chiah a ni a, kum 2019 leh 2022 khan Flamengo player a nih laiin a lo champion tawh bawk a ni.

Filipe Luis hian Serie A club Figueirense-ah bul ṭanin, Deportivo La Coruna, Atletico Madrid, Chelsea leh Flamengo tan a khel hman a, tunah chuan inkhelh a chawlhsanna club nen an inṭhen ta.