Zaninah Palmer inlan thei dawn

Chelsea boss Liam Rosenior chuan Arsenal laka lakchhuah ngai Cole Palmer a dam ṭhat thu a sawi a, "Arsenal lakah khan na chu a nei ngei a, mahse, tunah chuan engkim a ṭha tawh e," a ti.

Blues hian zanin dar 1:00-ah league match khel turin Aston Villa an lenchilh dawn a, team pahnih hi season thara Champions League khelh inchuh an nih avangin inkhel a hmuhnawm dawn.

Chelsea hi league match thum a zawnin an chak zo tawh lo a, Leeds United (2-2) leh Burnley (1-1) an inhnehtawkpui hnuah, Pathianni zan khan Arsenal chu khualmualah 2-1 in an ngam lo.

Tun hnai an result avangin Chelsea hi table lamah pawh tlahniam leh tawhin, parukna an ni mek a, UCL khel tur, panganaa awm chin, Liverpool an phak lohna hi match 28 khelh tawhah point thum a ni.

Hetihlai hian Aston Villa pawh an dinhmun a derthawng a, champion hial sawi ri hman kha table-ah palina an ni mek a, Unai Emery naute hi an league match hnuhnung pangaah vawi khat chiah an chak!

Hei vang hian zanin inkhel tur boruak a 'hot' dawn a, Chelsea fans tan Palmer-a dam thu hriat hi a nuam khawp ang. Rosenior chuan, "Palmer hian Arsenal lakah khan minute 83 a khel a, Enzo Fernandez nena ka lakchhuah chhan kha chu tactical decision a ni.

"Khatihlai khan player pahnih khan yellow card an hmu ve ve tawh a, kan tan chuan a hlauhthawnawm hle. Chumi rual chuan tha thar nen Alejandro Garnacho leh Liam Delap kha rawn lut se ka duh bawk vang a ni," a ti.

Chelsea boss chuan sawi zawmin, "Palmer hi Villa hmachhawn turin a dam ṭha a, Reece James pawh a dam ṭha," a ti a, hliam vanga chawl Marc Cucurella chu inlan thei dinhmunah a din tawh thu a sawi bawk.

Kum 23 mi Palmer hi tun season-ah hliamin a tlakbuak ve deuh reng a, season dang a phak lo. Inelna hrang hrangah match 20 khelin goal kua a khung a, assist vawi thum a nei bawk - ṭha thawkhat mah se, ama class nena teh erawh chuan fan-ten an la duhkhawp lo.