Leonard hoin Clippers-in Warriors hneh

NBA regular season khelh mekah nimin zing khan Los Angeles Clippers chuan 114-101 in Golden State Warriors an hneh a, Kawhi Leonard a langsar a, Warriors-in an ngam lo.

Chase Center, San Francisco-a inkhelah Clippers tan Leonard-a'n point 23 neiin a score sang ber a, rebound vawi riat lain assist pali a nei bawk a, inkhel zingah a langsar ber.

Leonard bakah hian Bennedict Mathurin (17), Kris Dunn (16), Darius Garland leh Jordan Miller (12) te an khel ṭha a, Clippers chak nan an thawhhlawk hle.

James Harden nena an trade, Darius Garland-a'n a vawi khat nan a inkhel a, Garland hian point 12 score nghalin assist pahnih a nei bawk a, Clippers tan a ṭangkai nghal hle.

Clippers hian match 60 khel tawhin vawi 29 an chak tawh a, vawi 30 a tlawm zawkah an ṭang. Western Conference table-ah pakuanaah awmin an hneh tak Warriors chu an chung chiahah an awm a, playoff khel turin beiseina sang tak an nei.

Brandin Podziemski-a'n point 22 neiin Warriors tan a score sang ber a, Nate Williams (18), Al Hordford (17) leh Moses Moody (10) te khel ṭha viau mah se Clippers an hneh zo lo.

Warriors hi an match hnuhnung pangaah vawi khat chiah an chak a, an thiampuipa Stephen Curry tel loin an chak hleithei lo. American point guard Curry hi a chawlh chen tur chiang lo mah se, a la rawn kir hnai lo niin amah Curry chuan chanchinbu mite a hrilh.