Inter-in Nico Williams an duh

Italian champion Inter Milan chuan Athletic Bilbao forward, Nico Williams lakluh an duh niin khawthlang chanchinbuten an tarlang.

Inter hian an tlarhma tihchak nan Williams hi an duh a, nipui laia lakluh an tum dawn a, Williams bakah hian Como forward Nico Paz lakluh an duh bawk. Mahse Paz hi Real Madrid-in seng luh an duh vangin an beisei a sang lo ang.

Williams hi lakluh duh mah se Inter tan buaina pahnih a awm a, Arsenal, Chelsea leh club dangin Williams hi lak tumin an hel ve reng a, Inter hian an duh tak tak a nih chuan a muangchan chi loh ang.

Hei bakah hian Williams khelh dan leh Inter a inmil ang em? tih chu zawhna awm a ni a, Inter hian defender pathum hmangin wing back an hmang thiam a, left wing back-a an chhawr Federico DiMarco chuan Serie A-ah assist 14 nei tawhin, assist ngah ber a ni mek.

Inter hian Williams an la lut a nih chuan Lautaro Martinez nen inkawp tura a khelhna hmun an thlak emaw, an khelh dan phung an thlak a ngai mai thei.

Zanin dar 1:30-ah Athletic Bilbao-in Copa del Rey semifinal-ah Real Sociedad an hmachhawn dawn a, Nico Williams a inhliam avangin a inlan ve thei dawn lo. Williams awm lo chungin Bilbao-in hnehna chan an tum dawn. First leg-ah Bilbao hian 1-0 a an hneh tawh loh avangin zaninah chak ngei an tum dawn.