MSL 11 a ‘hot’ nghal

Mizoram Super League season 11-na chu nizan aṭang khan khelh ṭan a ni a, boruak a sang nghalin entu mipui pawh an ṭhahnem nghal hle.

Match hmasa zawkah Saron Basketball Club-in thilmak an thlentir a, vawi thum lo champion tawh Khatla TBL 74-62 in an hneh. Inkhel hnuhnung zawkah champion lai Zarkawt BCA chuan Zemabawk Basketball Club 73-64 in an hneh bawk.

Saron an par

Inkhel ṭan hmain mi nawlpuiin Khatla TBL chak turin an ring ang, mahse Saron-in TBL an hlau lo a, theihna sang tak an nei tih lantirin an hneh. An match hmasa bera TBL an hneh avangin an inringtawk sawt ang.

Saron BC tan Lalmalsawma'n point 26 neiin a score sang ber a, Mala hian rebound vawi sarih a la bawk a, Saron Veng chakpuitu hi player of the match-a thlan a ni.

Mala bakah T. Lalhriatzela a khel ṭha a, Republic Veng tlangval Tea hian point 19 neiin rebound leh assist paruk a nei bawk a, Rinmuanpuia'n point 12 a score bawk. Foreigner Hugo Schotter chuan point thum chiah score mah se rebound vawi 14 zet a la a, Saron chak nan an thawh hlawk hle.

Khatla TBL tan Emmanuel VL Awmpuia point 31 neiin inkhel zingah ani aia score hnem an awm lo. Emmanuel-a khel ṭha viau mah se TBL a teammate ten an thlawp ṭha tawk lo a, a tlawm zawkah an ṭang.

TBL hian captain Vanlalṭhazuala leh an foreigner Makhel Ahkim Mitchell te an la khel thei lo a, an ṭhat dan bera an inlan hunah chhuanlam neih a thiang tawh dawn lo. Zanin dar 8:30-ah TBL hian kai thar Chhinga Veng an hmachhawn dawn a, a vawi li nan champion an tum a nih chuan an chak a ṭul.

Zemabawk vs BCA

Season hmasaah beisei phak baka an chet ṭhat avangin Zemabawk BC-in fans an ngah nghal hle a, BCA nen an inkhelh ṭum pawh hian veng mipui bakah veng dang mi, Zemabawk fans an tam hle. Mahse an vanduai zan a ni a, Zarkawt BCA an hneh zo lo.

Zarkawt BCA tan ram pawn player Caio Domingos Oliveira a tlangnel nghal a, point 22 neiin a score sang ber a, rebound vawi riat a la bawk.

Oliveira bakah Zonunsanga a che ṭha a, point 10 score-in assist 11 a nei bawk a, player of the match-ah thlan a ni. Anni bakah hian point 12 score-tu Lalnunpuia Renthlei leh Lalhmingsanga te an BCA chak nan an thawh hlawk bawk.

Zemabawk BC tan Carl James Snyder a che ṭha a, point 24 neiin a score sang ber. Snyder bakah K. Lalthianghlima (11), Shashank J Rai (11) leh Lallianmawia (10) te che ṭha viau mah se an chak zo ta lo.

Zanin dar 5:30-ah Zemabawk hian Mission Veng Hotshot nen an tum leh dawn a, Zemabawkin chetsual an duh tawh dawn lo. Hetihlai hian Hotshot hi MSL-a tawnhriat nei tawh an nih avangin zuam ngawt an thiang lo.