AFC leh CFC ten mipui thlawpna kan mamawh - AFC manager

Aizawl FC chuan Indian Football League-ah March 6, Zirtawpni zan dar 6:30 hian Rajasthan FC an mikhual dawn. Mizo club manager F. Lalrinmawia chuan Mizo mipuite Mizo club pahnih Aizawl FC leh Chanmari FC ṭawiawm turin a sawm.

India hmarchhak aṭanga I League champon thei awmchhun Aizawl FC hi tun ṭum inelnaah hian tawnhriat nei ṭha leh sulhnu nei ṭha an ni a, Mizo player-te an ṭhat ve bawk avangin budget sang lo mah se Mizo club pahnih hi vanneih a kaltluan chuan champion hial beisei thei an ni.

AFC manager F-a chuan, "India ram football buaina avangin engtin nge kan awm dawn tih reng reng ngaihtuahin hun kan hmang. Inelna tihchian a nih hnuah erawh theihtawp kan chhuah a, kan player neihsa bakah hnam dang tlemin min belh dawn," tiin inbuatsaihna hun an neih tlem thu a sawi.

F-a chuan sawi chhunzawmin, "Team boruak a ṭha, club boruak a ṭha a, President leh Sporting Director ten min hrethiam em em mai zel a. Team lamah chuan Pathian zarah harsatna em em kan nei rih lo. League erawh kum dang aiin a rei lo a. Inbuatsaihna hun kan nei tam lo. Mahse, tun dinhmunah chuan eng team pawh hmachhawna hneh vek thei turin kan inring tawk e. Mizo mipuiten heng club tana thawktute, a neitute kan support tlat chuan tun ai hian football-ah Mizo ṭhalaite tan kawng a inhawngin hma kan sawn zel ang," tiin Vanglaini a hrilh.

Aizawl FC-in Mizo mipui thlawpna an mamawh a, Chanmari FC pawhin an mamawh viau bawk. MPL champion Chanmari hian Marlch 7, Inrinni zan dar 6:30 hian Sreendi Deccan an mikhual thung ang.