East Bengal tan insiamṭhat hun

Indian Super League-a an match hmasa pahnihah beisei phak bakin East Bengal an khel ṭha a, goal ruk khungin an lamah goal khat chiah a lut!

Kolkata club hian NorthEast United chu 3-0 a an hneh hnuah Sporting Club Delhi chu 4-1 in an sawp leh a, mahse, an match hnuhnung berah Jamshedpur chu 2-1 in an ngam lo.

Table-ah panganaah East Bengal an tla thla nghal a, an hneh loh Men of Steel erawh match thum an khelh tawhah chak vekin, hmahruaitu Mohun Bagan nen tlawm an la nei lo - tun season-ah match 13 chiah khelh tur a awm!

ISL-ah match 13 chiah an khelh dawn avangin vawi khat chetsual a pawi viau a, East Bengal tan vawiin tlai dar 5:00-a FC Goa an mikhual hunah tlawm nawn a thiang lo ang.

Goan club pawh hi match thum an khelh tawhah an la tlawm lo. Manolo Marquez naute hian an match hmasa berah Inter Kashi (1-1) an draw a, a hnuah Mohammedan SC (2-0) leh SC Delhi (1-0) te a zawnin an hneh.

FC Goa tan Dinthar tlangval Ayush Chhetri chu player pawimawh niin, inkhel bul a la ṭan vek a, Ayush bakah hian Daniel Lalhlimpuia, Jerry Lalrinzuala leh Malsawmtluanga te an awm bawk.

East Bengal-in Mizo player paruk an kawl a, Lalchungnunga leh Edmund Lalrindika te chu player pawimawh zingah an tel phak - striker David Lalhlansanga chu bench aṭangin a lut ṭhin bawk.

Edmund-a'n Kolkata club-ah vanglai a chen thar leh mek a, match thum khelh tawhah goal hnih khungin, assist vawi khat a nei a, penalty hlawhchhuah vawi khat a nei bawk - goal li a thawk chhuak tawh tihna a ni.

Zaninah pawh Lunglei tlangval hian en bik a hlawh leh ang tih a chiang a, Kolkata club ṭantuten an club tana danglamna thlen turin an beisei leh ang.

East Bengal hian Odisha aṭangin Jerry Mawihmingthanga la lut mah se, Chanmari forward hian training a zawm tlai avangin a la inlan rih lo a, Mizo rawlthar beiseiawm Vanlalpeka Guite leh Lalramsanga te chu East Bengal-ah hian an awm bawk.