Everton-in beiseina thar nei

Premier League match ruk zet anmahni muala an chak zawh tawh loh hnuah Everton-in Hill Dickinson Stadium-ah hnehna an chang ve leh ta a, an mikhual Burnley chu 2-0 in an hneh.

David Moyes-a team tan James Tarkowski chuan minute 32-naah ṭha zetin a tauh lut a, second half-ah Kiernan Dewsbury-Hall chuan a belhchhah ve leh bawk - hun tawp thlengin goal dang a lut lo a, Everton an chak.

Everton-in hnehna an chan avangin table-ah pariatna an ni a, point nga chiahin panganaa awm Liverpool an phak lo - league match kua khelh tur a la awm avangin European football a beisei ngam.

David Moyes-a team tan Champions League a sang hret a nih pawhin Europa League emaw Europa Conference League emaw chu beisei ngam niin a lang a, European football khelh phak ngei an tum ang.

Hetihlai hian Burnley erawh league match 18 zet an tlawmna a ni ta a, table-ah 19-na dinhmun luah mekin, a him china awm Nottingham Forest chu point riat ngawtin an thlau mek - nizana Forest result a zirin an inthlauhna hi a danglam leh thei bawk.

Tun dinhmunah West Ham, Burnley leh Wolverhampton Wanderers te chu relegation zone-a awm mek an ni a, season hmasa khan 17-na Tottenham Hotspur chuan point 38 hmuin an him - a tla zinga point hmu sang ber Leicester City-in point 25 an hmu thung.

EPL season-ah hian point 36 hmuh hi a him china ngaih tlangpui a ni a, tun dinhmunah relegation zone-a awm te bakah Crystal Palace, Leeds United, Tottenham leh Nottingham ten point 36 an la hmu phak lo.

Leeds United pawh hi Thawhlehni zanah inlanin, an mikhual Sunderland chu 1-0 in an ngam lo a, Ethan Ampadu handball vanga an penalty chawi chu Black Cats hian hrem nan hmangin, Habib Diarra chuan penalty hi a chhuih lut a, 1-0 in Sunderland an chak.