Referee thutluknaah Spurs lawm lo
Premier League team talbuai mek Tottenham Hotspur chuan Professional Game Match Officials Limited (PGMOL) hotupa Howard Webb hnenah lehkha an thehlut a, tun season-a match official-te thutlukna tam tak an hriatthiam loh thu an thlen.
Spurs hian match official thutluknaah lai lo a awm ṭhin niin an ngai a, match ṭhenkhata goal atana pawmsak a, a hnu match-a pawmsak leh si loh awm ṭhinte chu an hrethiam lo tih an ziak.
London club hian tun season-ah referee thutlukna tam tak an tuar niin an sawi a, heng zingah hian February thla tawp lama Arsenal laka 4-1 ngawta an tlawmna inkhel chu a tel.
Kha inkhelah khan 2-1 a an hnufual laiin Arsenal tan striker Randal Kolo Muani chuan si phurh sutna goal a khung a, mahse, kha inkhela match official-te chuan French striker hian a goal khung hmaiin Arsenal defender Gabriel Magalhaes chu a nam niah an ngai a, pawmsak an ni lo.
Mahse, hetiang deuh chiah hian an league match hnuhnung bera Fulham an ngam loh ṭumin, Fulham tan Harry Wilson chuan goal hmahruai a khung a, mahse, pawmsak an ni leh lawi si - Wilson-a goal khung hma hian Mexico striker Raul Jimenez chu Spurs defender Radu Dragusin lakah a foul niin a lang a, mahse, an pawm tlat.
Hei chauh a ni lo. Spurs chuan Newcastle United leh Arsenal inkhelh ṭum a, Magpies striker Nick Woltemade-a goal pawh hetiang thoa lut hi niin an sawi a, goal luh hmain Brazilian centre-back Gabriel lakah foul a awm. Mahse, pawm a ni tho.
Referee thutlukna inang lo ṭhin hi Spurs hian pawm harsa an ti a ni ber a, hei vang hian an lungawi lohna an thlen. London club hi EPL aṭanga tla thei dinhmunah an ding mek a, table-ah 16-na an ni mek.
Spurs hian relegation zone-a awm chin West Ham chu point li chauhin an tlansan a, an dinhmun a him lo takzet. Coach Thomas Frank banin, season tawp thleng coach lailawk atan Igor Tudor an la lut a, an la tifuh rih lo.
Kum 47 mi coach hian Spurs hi league match hnih kaihruai tawhin, a la tlawmpui ve ve a, zanin dar 1:30-ah league match khel turin Crystal Palace an mikhual zui ang.