Copa del Rey aṭangin Barca an tla

Copa del Rey semifinal second leg-ah Barcelona chuan 3-0 in Atletico Madrid hneh mah se first leg-ah goal li an chhuah avangin inelna aṭangin an tlat. Hansi Flick leh a hote quadruple champion nih an tumna a thamral. Thawhlehni zana inkhelah hian Barca tan Marc Bernal-a'n goal hnih a khung a, Raphinha-a'n goal khat khung bawk mah se an goal mamawh zat a khung pha lo. Diego Simeone hote aggregate-ah 4-3 in an chak.

Inlehthal tumna chu

Spotify Camp Nou-a inkhelah dan pangngaiin Barca-in ball an chang tam a, inkhel an thunun tluan zak. A tir aṭangin Barca an phur nghal a, Fermin Lopez-a'n goal a khung nghal teuh hle a, goal bar a pet per hlauh.

Catalan club tan Ferran Torres-a'n a chance neih vawi hnih lai a hlah a, goal hmaah a hriam tawk lo. Atletico-in chance an nei ve tho a, Antoine Griezmann-a shot chu Joan Garcia-a'n ṭha takin a dansak.

Barca an vanduai reng lo a, minute 29-naah Bernal-a'n goal ruakah hnai tak aṭangin a pet goal a, goal a luh theih nan Lamine Yamal-a'n defender pahnih a bum ṭha hle.

First half hun pek belhah Atletico defender Marc Pubill-a'n Pedri a titlu a, Barca-in penalty an hmu. Captain Raphinha a rawn pen chhuak a, Brazilian forward hian ṭha taka petin an goal hnihna a khung.

Second half-ah Barca bawkin an nawr a, Ferran Torres, Bernal leh Raphinha ten an chance duhawm neih an hlah vek a, Atletico keeper Juan Musso a khel ṭha ve bawk.

Minute 72-naah Bernals-a'n goal a khung leh a, Joao Cancelo ball vawr luh chu goal kilah tak a pet lut a, Musso tan dan ngaihna a awm lo a, a en liam.

Barca-in Atletico nihrual turin goal khat an la mamawh a, na takin an anwr chhunzawm. Gerard Martín leh Lamine Yamal ten chance nei mah se goal an khung thei tawh lo a, hun tawp thlenga goal dang a luh tawh loh avangin vannei takin Atletico an chak a, final an lut.

Quadruple aiah Treble

First leg khelh a nih hma khan Spanish Super Cup-ah Barca an champion tawh a, inelna dangah an la dam vek bawk avangin Barca-in quadruple champion nih an inbeisei.

Mahse beisei angin thil a kal lo a, First leg-ah 4-0 ngawtin Atletico an hneh lo a, Ademola Lookman an ngam lo hle. Second leg-ah theihtawp chhuahin lehthal tum mah se goal thum bak an khung thei lo a, quadruple an beiseina a bo.

Quadruple champion ni thei tawh lo mah se, UCL leh La Liga-ah beisei an la neih avangin Barca hi treble champion an la ni thei tho a, quadruple aiin hniam mah se club tam tak tih theih loh vangin a ropuina a nep bik lo.

March 10, Thawhlehniah Newcastle United nen UCL quarterfinal luh an inchuh dawn a, La Liga-ah an hmelma Real Madrid an chetsual bawk avangin point liin hma an hruai tawh bawk. Mahse La Liga-ah match 12 khelh tur a la awm avangin Hansi Flick-a naute hi an khelh ṭhat reng a ngai.