Bahrain leh Saudi Arabian GP cancel dawn em?

Australian Grand Prix neih tura inbuatsaihna a kal mek laiin thuthang a awm mek a, Bahrain leh Saudi Arabian Grand Prix chu cancel a ni dawn tih khawthlang chanchinbu ten an tarlang.

Tun hnaiah Middle East-ah US, Israel leh Iran inkara buaina a tam hle a, an inbeihna avang hian a ṭhenawm ram dangah te a kangkai lo thei lo a; United Arab Emirates, Kuwait, Saudi Arabia, Qatar leh Bahrain-te chuan Iran missile-in a target zingah a tel niin an tarlang bawk.

Thuchiang engmah la awm lo mah se hetiang boruak karah hian Bahrain leh Saudi Arabia Grand Prix an ṭhulh a rinawm ta hle. FIA-in Thawhlehni khan 2026 World Endurance Championship, March 26-28 Bahrain-a neih tura ruahman chu a hun an sawn tawh bawk.

Kum 2026 Bahrain Grand Prix hi April 10-12 a neih turin sawn a ni a, April 17-19 Saudi Arabian Grand Prix in a chhunzawm ang a, Saudi GP hi Jeddah-ah neih tura ruahman a ni.

Hetihlai hian March 8, Pathiannia ṭan tur, Australian Grand Prix chu Middle East-a buaina chuan a nghawng dawn lo niin Australian GP huaihawttuten an sawi a, staff member ṭhenkhatten an Australia an panna kawngah harsatna tawk mah se buaina a awm dawn lo niin an sawi bawk.

Australian Grand Prix bakah hian Formula 1 chuan thil thlen dan chu uluk takin an en dik ve reng bawk a, April thlaa Bahrain leh Saudi Arabia-a inelna neih tur chu harsatna awm loa thlentir an tum hle.