Como leh Inter-ah chak zawk awm lo

Thawhlehni zan Coppa Italia semifinal first leg inkhelah Como leh Inter Milan an inkhel a, team pahnihte 0-0 in an inhnehtawk a, chak zawk an awm lo. Second leg hi April 23-ah khelh a ni leh chauh ang.

Inkhel ṭan aṭangin Cesc Fabregas-a naute an hlauhawm nghal a, Como forward Mergim Vojvoda-a'n chance duhawm vawi thum ngawt a hlah a, goal hmaah a hriam tawk lo. Tun season-a che ṭha tak Nico Paz-a'n a chance neih a chhawr ṭangkai thei bik lo.

Second half-ah Inter an insiamṭha hret a, Matteo Darmian-a'n goal a khung nghal teuh hle. Manchester United defender hlui hian goal ban a pet per a, Inter chance neih hlauhawm ber a ni zui.

Como player te finishing a ṭha tawk lo a, left back Álex Valle-a'n hnai tak aṭangin goal zawnah a pet thei lo a, an vanneih zan ni se goal tam zawk khung thei tur an ni. Hun tawp thlenga goal a luh loh avangin team pahnihte an inhnehtawk.

Inter-in an player te hahdamna hun an pe a, Como lakah an rinrawl tam zawk an chhawr lo. Cristian Chivu naute hi Champions League aṭangin Bodo/Glimt-in an pet chhuak a, treble champion an beiseina a tawp.

Serie A leh Coppa Italia-ah chiah nomawi an beisei tawh avangin an hun ṭha neih bawlhpelh an tum tawh dawn lo a, second leg-ah hnehna chan ngei an tum ang.