French Cup semifinal lut hmasa ber Strasbourg

Liam Rosenior-a'n Chelsea panin chhuahsan mah se Strasbourg-in harsatna an tawk lo a, Thawhlehni zan khan 2-1 in Reims an hneh a, French Cup semifinal an lut.

Strasbourg tan Joaquin Panichelli leh Julio Enciso ten goal an khung a, Reims tan injury time-a Patrick Zabi goal khungin awmzia a nei phak lo a, scoreline timawitu chauh a ni

Inkhel ṭan aṭangin chance hmuh tur tam a, mahse team pahnihten a hmawr an bawk fuh theih loh avangin goal a lut har.

Strasbourg tan Sebastian Nanasi, Gessime Yassine, Guela Doué ten an chance neih an chhawr ṭangkai thei lo vek a, goal hmaah Strasbourg an vanduai.

Reims-in chance hlauhawm sawi tur an ngah lo a, Hiroki Sekine-a'n an chance ṭha ber neiin a ball pet kawh tak chu Strasbourg keeper Mike Penders-a'n a dang ṭha tak zet.

Strasbourg an vanduai reng lo a, Reims forward John Patrick handball vangin penalty an hmu. Panichelli-a'n penalty khungin a team hma a hruaipui.

Argentine forward Panichelli hian tun season inelna hrang hrangah goal 16 a khung tling tawh a, World Cup-ah Argentina-in an koh ngei a beiseiawm.

Minute 38-naah Strasbourg-in penalty an hmu nawn leh a, Brighton & Hove Albion forward hlui Enciso-a'n pet ve thungin an hmahruaina a belhchhah.

Hun tawp hma hretin Reims midfielder Zabi-a'n a pet goal vein an siphurh a sut ṭhen a, Reims phur hman viau mah se goal dang khung leh turin hun a awm tawh lo a, Strasbourg 2-1 in an chak.