Lakers chakna James leh Doncic

NBA regular season khelh mekah nimin zing khan Los Angeles Lakers chuan 110-101 in New Orleans Pelicans an hneh a, LeBron James leh Luka Doncic te an che ṭha hle.

Crypto.com Arena, Los Angeles-a inkhelah Doncic-a'n point 27 neiin a score hnem ber a, rebound vawi 10 lain assist pasarih a nei bawk. Veteran player James-a'n point 21, rebound leh assist pasarih neiin Doncic nen triple double an siam teuh hle.

James hi kum 41 ni ve tawh mah se court chhungah a la ṭangkai a, a tha a la za hle. LeBron leh Luka bakah Austin Reaves (25), Deandre Ayton (13) leh Marcus Smart (10) te Lakers chak nan an thawhhlawk hle.

Pelicans tan Zion Williamson (24), Trey Murphy (21), Saddiq Bey (18) leh Dejounte Murray (15) te khel ṭha viau mah se an vanduai ṭum an tawng a, Lakers hneh nan a tawk zo lo.

Lakers hi Western Conference-ah paruknaah an awm a, playoff khel turin an dinhmun sawhngheh zel an tum. Hetihlai hian Pelicans erawh 13-naah an awm a, chhiarkawp danin playoff la khel phak mah se an khelh loh a rinawm tawh zawk.