Mizoram Super League 5 fixtures a chhuak

Tualchhung basketball inelna sang ber Mizoram Super League chu tun season atan February 25, Thawhlehni aṭang hian Hawla Indoor Stadium, Republic Vengthlangah khelh ṭan a ni dawn.

Ningani zan khan Hotel Regency-ah MSL 6 fixtures pawhna leh handbook tlangzarhna neih a ni, MSL board member Dr Lalrinawma Hnamte chuan handbook hi a tlangzarh.

Season danga kan la hmuh ngai loh kuminah hian kan hmu dawn, March 12 leh 13 hian Lunglei khawpuiah match neih tura ruahman a ni. Leitlangpui hian tualchhung club hlun leh ṭha Tuikual South leh Khatla TBL inhmachhawn an chang fuh dawn tihna an ni - chhim lam basketball fans an vannei hle.

MSL6-ah hian team ṭha paruk - Khatla TBL, Zarkawt BCA, Tuikual South, Chanmari Vikings, Ramhlun SC leh Chawnpui BC te an inel dawn. Vawi khat ṭheuh an inkhel kual dawn, a sang pali ten semifinal khelin a hniam pahnih chuan relegation playoff an khel thung ang. 

Semifinal leh playoff hi best of three hmanga khelh tur a ni. Basketball hi infiamna a nih rualin ennawm pawh a ni tel a, player ṭha zual inelna All Star Game chu March 19, Ningani zanah neih a ni leh dawn; player ṭha bik ten fans mit an ti tlai leh dawn.

Tualchhung player ṭha chu MSL-ah hian an inlan kim ṭhin, inelna ti hmuhnawm zual turin kuminah hian India ram state danga mi player pahnih a lakluh theih, heng bakah hian ram pawn a mi player pakhat a lak theih bawk.