Gunners aiin City an chesual hmasa zawk

Premier League champion inum boruak sang takah kum 20 chuang champion tawh lo Arsenal aiin tun hnaia vawi tam champion Manchester City an chesual hmasa zawk. Nilaini zan khan Pep Guardiola hoten Nottingham Forest an mikhual a, 2-2 in an inhnehtawk.

Etihad Stadium-a inkhelah Antoine Semenyo hmangin Man City-in minute 31-naah goal khung mah se Morgan Gibbs-White hmangin Forest-in minute 56-naah an sut. Rodri hmangin City-in minute 62-naah hma hruai nawn mah se Forest tan Elliot Anderson-a'n minute 76-naah siphurh a sut nawn.

City-in an mualah point hnih an hloh avangin an kutah nomawi a awm tawh lo a, an khelh hmabak an chak vek a nih pawhin Arsenal an chetsual a ngai a, Pep Guardiola hote aiin Mikel Arteta hote champion turin an buk a rit leh ta zawk.

Forest hian Etihad Stadium-ah point hlawhchhuah an tum a, inkhelh ṭantirh aṭangin goal venhim hna an thawk. City-in ball chang tam mah se Forest tlarhnung ṭhiah an harsat a, goal hmaah mikhual team hi goal hmaah an hriam tel bawk. Gibbs-White hian mawi zetin a kheng lut a, Gianluigi Donnarumma tan pawh dan ngaihna a awm lo. Anderson-a goal khung pawh a ṭha takzet a, Italian keeper dem theih pawh a ni lo.

Chutirhualin City an vanduai a, hun tawp hma chiahin box chhung buai nuaih karah Savinho-a'n goal khungna remchang a nei a, goal zawnah pet mah se goalline a ding Murillo-a'n a dang. Season tawpah Arsenal an champion a nih chuan Brazilian Murillo hi an champion theihna thawh hlawk ber zinga mi a ni thei hial ang.

Inkhelh banah Man City manager Pep Guardiola chuan, "Chak kan phu lo pawh a ni thei a, mah se minute 90 chhung khan kan khel ṭha. Kan khingpuite khan goal venhim an tum a, an nawr let theih bawk avangin a harsa. Chutihrualin point kan hloh avangin ka player-te ka mawhpuh dawn lo. Chak thei tur kan ni a, kan vanduai a, goal kan khung lo," tiin a sawi. City hian 70% ball an chang a, vawi 21 shot an neih bawk avangin Forest lakah hian an vanduai a tih theih.