Team khat chauhin football kan khel - Hurzeler

Arsenal-in Brighton 1-0 in an hneh a, inkhelh banah Seagulls manager Fabian Hurzeler chuan team khat chauhin football an khelh thu a sawi. Mualneitu hian 58% ball an chang a, goal-ah vawi 13 an pet. Arsenal erawh vawi li chiah an pet a, vawi hnih chiah goal-ah a kal. Team ṭha zawka ngaih Gunners-in goal khung belh aiin goal venhim a ngaih pawimawh.

Hurzeler chuan, "Vawiin hian team pakhat chauhin football khelh kan tum. Engtik lai mahin hetianga chak tum manager hi ka ni ngai lo. Player-te hmasawnna ka ngai pawimawh a, khelmualah chuan football kan khel tur a ni. A tawpah chuan team zawng zawngin hun khawhral kan tum vek a, mah se Premier League-ah chuan a chintawk hi a awm ve ngai.

"Referee an pawimawh a, tunah chuan an duh ang tawkin an khel an ni ber. Helai room-a awm zingah inkhel kha hmuhnawm taka thlir kan awm chuan ban phar ula, pakhat te chu an awm mahna. An awm a nih chuan Arsenal ṭantu a ni ang. A bak zawng chuan hmuhnawm an ti lo ang," tiin a sawisel na hle.

Brighton manager-in sawisel na viau mah se Arsenal-in an duh ber point thum an hlawh chhuak. Gunners manager Mikel Arteta chuan, "Ka player-te hi ka hmangaih a, tute pawhin kan player-te ṭheuh hi kan duhsak vek. Tuna kan khelh danah hian kan lungawi. Mahni team ṭheuh hi kan ngaihven tur a ni," tiin sawiselna a ngai pawimawh lo a, champion kawng an zawh zel tur thu a sawi.