Hotshots leh Chanmari chak nghal

Mizoram Super League khelh mekah Nilaini zan khan, Mission Veng Hotshots leh Chanmari Basketball Club ten an khingpuite an hneh ve ve a, an match hmasa berah hnehna an chang.

Match hmasa zawkah Hotshots chuan 106-73 in Tuikual South BC an hneh a, inkhel hnuhnung zawkah Chanmari BC-in 86-73 in Chhinga Veng BC an hneh bawk.

Hotshots an puak ring

Team pahnihte kai thar ni mah se MSL-a sulhnu lo nei tawh an ni a, mipui ngaihven a hlawh a, inkhel entu an ṭhahnem.

Hotshots ram pawn player Darnell Johnson a khel ṭha a, Johnson hian point 40 score-in ani aia score sang an awm lo. Hotshots Lalruatkima langsar a, Ruatkima hian point 22 a nei a, player of the match-ah thlan a ni.

Anni bakah hian inter state player Japjit Singh (12), Lalhlunmawia leh Moses Zoremmawia te an khel ṭha a, Hotshots chak nan an ṭangkai hle.

Tuikual South BC tan K. Liandinga (21), Lalbiakkima (12) leh Vanlalhmangaihzuala (10) te khel ṭha mah se an vanduai zan an tawng a, Hotshot hneh nan a tawk zo lo.

Tuikual South hian zanin dar 8:30-ah Saron BC an hmachhawn leh nghal dawn a, chetsual nawn an tum tawh lo ang. Saron hian an match hmasa berah Khatla TBL an hneh thei a, Chhinga Veng tan fimkhur taka khelh a ngai ang.

Saron coach Marc Lalthlamuana Sailo (Tetea) chuan,"TBL hi vawi eng emaw zat lo champion tawh an nih avangin kan hneh nghal kan ring bik lo. Mahse theihtawp kan chhuah a, anni lamah khel thei lo an awm bawk avangin a vannei zawkah kan ṭang ta a ni. TBL kan hneh takah chuan kan phur sawt a, club lian dang kan tum turah pawh inrintawkna nasa tak min pe," tiin Vanglaini a hrilh.

Chanmari vs Chhinga Veng

Chhinga Vengin a vawi khat nan MSL khel mah se Chanmariin zahngaihna an lantir lo a, 86-73 in an hneh. Inter state player Mohammad Ishan chuan point 23 neiin a score hnem ber a, Ishan hian rebound vawi 20 zet a la bawk. Ishan bakah Lalrozama a che ṭha lehpek a, season hmasaa Zemabawk BC semifinal thlenpuitu, Rozama hian point 18 leh assist 10 neiin double double a siam a, player dang angin sang lo mah se Rozama a ṭangkai hle.

Rozama bakah a unaupa Lalnunsanga'n point 13 a nei a, Lokendra Singh (14) leh Michael Liansanga (13) ten Chanmari chak nan an thawh hlawk hle.

Chanmari hian vawiin tlai dar 5:30-ah Zarkawt BCA an tum leh nghal dawn a, champion lai BCA hian an match hmasa berah Zemabawk BC an hneh tawh a, Chanmrariin theihtawp chhuaha an hmachhawn a ngai ang.