Manchester United - an chak lo ve ta!

Michael Carrick hnuaia a vawi khat nan Manchester United-in chak lohna an tem ve ta - Nilaini zan khan United hian khualmualah Newcastle United an lenchilh a, 2-1 in an tlawm.

Magpies-in an league match hnuhnung pasarihah vawi khat chiah chak an nei a, Manchester United erawh Carrick hnuaia league match sarih an khelh tawha la tlawm lo an ni a, an inang lo hle.

A tawi zawnga sawi chuan United chak a beiseiawm zawk a, chu beiseina belhchhah tur chuan first half hun pek belh minute khatnaah Magpies player Jacob Ramsey chu hnawhchhuah a ni.

Referee Peter Bankes-a'n Ramsey hi penalty hlawhchhuah tuma dive-ah a ngai a, a yellow card pahnihna pein a hnawk chhuak. Player tam zawkin United an khel a, an chance a ṭha leh sawt.

Mahse, United hlim chhung chu rei lo tak a ni. First half hun pek belh, minute ruknaah vek penalty an chawi zui a, captain Bruno Fernandes-a'n Anthony Gordon laka a chawi a ni - Gordon hian goal-ah a chantir zui.

First half hun pek belh hi 'drama' a ni ber. Rin loh zawk Magpies-in goal an khung a, first half hun pek belh chhung vekin Casemiro-a'n Bruno-a freekick aṭanga ball kal chu a tauh lut a, 1-1 in chawlhlawk an hmang.

Second half-ah beisei angin goal dang a lut lawk tawh lo. Gordon-a'n 2-1 a a team hmahruaipuina chance nei mah se, a chhawr lo a, a uiawm takzet.

United pawhin chance duhawm tak an nei a, mahse, an chhawr bik lo - Leny Yoro tauh luh ngei tur nia lang chu Aaron Ramsdale-a'n ṭha zetin a dansak a, Joshua Zirkzee pawh Magpies keeper hian a dansak.

Team pahnih hi point an insem mai dawn niin a lang tawh a, mahse, beisei loh thil a thleng - minute 90-naah bench aṭangin William Osula luhtir a ni a, mawi zeta chakna goal khungin, Carrick-a hnuaia a vawi khat nan United an tlawm.

Red Devils hi pathumna an la ni zel a, mahse, Aston Villa nen an point hmuh zat a inang - pangana Chelsea leh parukna Liverpool aia an sanna pawh point thum chauh a ni a, season thara Champions League khel turin a la chiang lo.

United boss Carrick chuan, "Kan chak loh aṭang hian kan inzir a ngai a, chu chu kan chak loh kan chhawrna tur a ni ang. Match tam tak a la awm a, inthlahdah thei kan ni lo," a ti a, Europe-a United hruai kai ngei a tum.