Eng club mah kan huphurh lo - Isaka

Odisha FC forward Isak Vanlalruatfela chuan eng club mah an huphurh loh thu Vanglaini a hrilh - zanin dar 5:00 hian Mohun Bagan chu khualmualah an lenchilh dawn a, ISL champion lai Bagan hi league match thum khelh tawhah tlawm an la nei lo.

Isaka chuan, "Kei chuan eng club mah hi huphurh hran ka nei ngai lo. Chutihrual chuan Bagan hi rei tak training nei tawh, team ṭha ve tawk tak an ni a, keini erawh kar khat pawh training mumal nei loa ISL hmachhawn kan ni thung.

"Hei vang hian a harsa ve deuh a, mahse, theihtawp kan chhuah ang," a ti. Isaka chuan a mimal tak pawha a ṭan thu sawi zuiin, "Ka contract tawp kum tur a ni tawh a, theihtawp chhuahin match tin hi ka khel dawn.

"Mahse, sawi tawh angin, training kan nei tlai a, coaching staff leh player lah a thar kan awm nuk bawk si a, duhthusam result neih chu a harsa hle. Heti chunga match hnih aṭanga point hnih hmuh chu a ṭha hle," tiin Vanglaini a hrilh.

Lalengmawia Ralte khelhna Bagan hi Odisha coach hlui Sergio Lobera enkawl an ni a, Isaka chuan, "Tun dinhmun ka thlen theih chhan hi Pathian vang a ni a, coach ka hrawn tawha ṭha ka la tih ber Lobera team ka hmachhawn dawn.

"Ani pawhin min rawn biain, match tina theihtawp chhuah turin min rawn hrilh. Inkhelh ka châk tawh a, chak leh chak loh erawh Pathian thu a ni," tiin Vanglaini a hrilh.

Odisha hian Isaka bakah K. Lalṭhathanga (Puitea), Vanlalzuidika, Jeremy Zohminghlua, Lalrinfela Khiangte te an kawl. Zanin dar 7:30-ah Mark Zothanpuia leh C. Lalhriatpuia awmna Jamshedpur chuan Inter Kashi an mikhual bawk ang.