Central YMA Cricket a awm dawn

Central YMA leh Cricket Association of Mizoram ṭangkawp chuan kumin April thla hian Inter Branch YMA Cricket Tournament a buatsaih dawn. Entry fee hi Rs 1000 a ni a, March 12, 2026 ral hmain Central YMA office emaw GPay (9774263515) hmanga pek tur a ni.

Branch khat aṭangin team khat an tel thei ang a, Mizoram pawn group YMA te chu group hminga tel phal an ni ang. Team khatah player 20 leh official pathum ziahluh theih a ni a, squad theihluh tih danglam theih a ni dawn lo.

Player-te awmna tichiang turin Voter ID hman a ni ang a, kum la tling lo tan Aadhaar Card pawm a ni dawn. Voter ID leh aadhar card hi December 31, 2025 hnu lama transfer chu pawm a ni dawn lo.

Entry Fee pek rualin branch aiawh coach/manager phone number (WhatsApp khawihna) thehluh tel tur a ni a; March 12, 2026 ral hmain squad list hi hard copy-in Central YMA Office-ah thehluh tur a ni bawk.

Vuak hawn leh fixture tlangzarh hi March 20, 2026 (Zirtawpni) zan dar 8:00-ah Central YMA Hall-ah neih a ni ang. Hetah hian tel tur Branch aiawh team manager leh captain-te tel tur a ni ang.

Central YMA Cricket hi kum 2003 aṭanga ṭan a ni a, champion hmasa ber chu Armed Veng niin champion ngun ber erawh Ramhlun Venglai niin vawi ruk an champion tawh a ni.