Galatasaray-in Anfield-ah fans nei thei dawn lo

Champions League round of 16-a Liverpool hmachhawn tur Galatasaray chuan Anfield-ah fans an nei thei dawn lo a, UEFA chuan Turkish club hi European football-a khualmual match khata ticket hralh thei lo turin a hrem.

Galatasaray hian February 25 zan khan Champions League knockout playoff second leg-ah Juventus an lenchilh a, 3-2 in an tlawm. Mahse, inkhel hmasaah 5-2 a an lo chak tawh avangin 7-5 in an tlang.

Juve khelmuala inkhelah Galatasaray fan-ten buaina an siam a, khelmualah halmawi leh thil dang an vawm lut. Hei vang hian UEFA Disciplinary Committee chuan Turkish club hi a hrem a, away match khat chu ticket hralh thei lo tura an tih bakah, €40,000 (nuai 82.45) an chawitir.

Mahse, Galatasaray chuan thuchhuah siamin, UEFA Disciplinary Committee thutlukna hi ngaihtuah ṭhat tura an thlen tur thu an sawi a, an hlawhtling kher ang em, tih erawh sawi theih a ni lo.

Italian media-te chuan inkhelh hma aṭang tawhin Galatasaray fan-te hian buaina an siam niin an sawi a, Juve ṭantute leh Police nen pawh boruak an nei. Inkhelh laia an halmawi vawm vel avang hian inkhel entu zinga mi, pa leh a fanu pakhat chu damdawi in hruai an ngai hial.

Liverpool leh Galatasaray te hi March 10, Thawhlehni zanah UCL last 16 first leg-ah an intawng ang a, March 18, Nilaini zanah Turkish club hian Anfield-ah Reds hi an lenchilh ve leh ang.

Club pahnih hi league stage-ah lo inhmachhawn tawhin, Turkish club hian Victor Osimhen-a penalty goal hmangin 1-0 in hnehna an chang - Reds hi UCL-a an inlan hma hian FA Cup lamah an inlan leh phawt dawn.

Zanin dar 1:30 hian FA Cup fifth round-ah Wolverhampton Wanderers an lenchilh dawn a, Premier League mawngphah luahtu hi an league match hnuhnung berah 2-1 in an ngam lo - zaninah chak chiang saa dah chi an ni bik lo ang.