Real Sociedad-in Copa del Rey final lut

Nilaini zan Copa del Rey semifinal khelhah Real Sociedad chuan 1-0 in Athletic Bilbao an hneh a, final an lut. Sociedad tan Mikel Oyarzabal-a'n penalty aṭangin goal awmchhun a khung a, aggregate-ah 2-0 a chakin final-ah a team a hruai thleng.

Anoeta Stadium-a inkhelah mikhual team-in chance an nei hmasa zawk a, Álex Berengue-a'n vengtu nei lo mah se goal zawnah a tauh thei lo. Sociedad tan Carlos Soler a freekick pet ṭha tak chu Bilbao keeper Alex Padilla-a'n a dang ṭha hle.

Sociedad-in an nawr chhunzawm a, Goncaolo Guedes leh Jon Gorrotxategi ten an hun ṭha neih an chhawr ṭangkai thei lo a, goal lut loin chawlhlawk an hmang.

Second half-ah Sociedad bawk an hlauhawm a, Gorrotxategi-a'n corner aṭangin a tauh goal teuh hle a, an vanneih zan ni se goal tam zawk khung thei tur an ni. Bilbao erawh bet bik lo mah se chance an insiam thei meuh lo.

Goal a lut tawh dawn loa a lan hnuah Sociedad-in penalty an hmu a, minute 87-naah Gorrotxategi-a'n ball tauh tuma a zuang chu Bilbao defender ten an tibuai a, VAR rawn a nih hnuah referee-in penalty a pe. Sociedad tan captain Oyarzabal-a'n ṭha takin a chhuih lut.

Hun tawp hma hretin Bilbao midfielder Mikel Vesga-a'n chance duhawm a nei a, hnai tak aṭang a pet chu Sociedad keeper Unai Marrero-a'n ṭha takin a dang. Marrero hian pet goal mah se first leg-ah goal an chhuah avangin goal khat dang an la mamawh dawn tho a, Sociedad an chak dawn tho.

Copa del Rey final hi April 18, Inrinniah khelh a ni dawn a, Real Sociedad hian Barcelona hnehtu Atletico Madrid an hmachhawn dawn. Sociedad leh Atletico tan tun season-a an nomawi beisei theih awmchhun a ni tawh a, final-ah inkhel hmuhnawm kan hmuh a rinawm.