Lazio leh Atalanta inhnehtawk

Coppa Italia inkhelah Nilaini zan khan Lazio leh Atalanta te an inkhel a, chak zawk an awm loin 2-2 in an inhnehtawk. Lazio tan Fisayo Dele-Bashiru leh Boulaye Dia ten goal khung a, Atalanta tan Mario Pasalic leh Yunus Musah ten goal an khung bawk.

Stadio Olimpico-a inkhelah first half-ah chance hmuh tur a tam lo a, Atalanta tan Davide Zappacosta-a'n goal bar a pet per a, Chelsea defender hlui chance neih hi first half-a chance hlauhawm awmchhun a ni. Team pahnihte an fimkhur avangin inkhel chawhma lam a hmuhnawm hran lo.

Second half-ah team pahnihte an insiamṭha a, goal kan hmu zui nghal. Minute 47-naah Daniel Maldini ball pek chu Dele-Bashiru-a'n umk lutin keeper a chip khum a, goal mawi tak nen a team hma a hruaipui.

Atalanta-in an chhanglet rang a, minute li hnu lawkah Lazar Samardzic-a shot chu Lazio keeper Ivan Provedel-a'n ṭha takin dang mah se, Pasalic-a'n a per let chu chiang takin a khung a, an siphurh a sut.

Minute 87-naah goal a lut leh chauh a, Arsenal defender hlui Nuno Tavares-a cross chu Pasalic-a'n a la fuh tawk lo a, Dia-a'n chhuhsakin a pet goal a, Lazio hma a hruai nawnpui.

Lazio phur hman viau mah se minute hnuih hnu lawkah Atalanta-in goal an khung ve nghal a, Kamaldeen Sulemana cross chu vengtu nei lo Musah-a'n goal kilah tak a pet lut a, an siphurh a sut nawn. Goal dang lut zui loin hun a tawp a, team pahnihte 2-2 in an inhnehtawk.

Inhnehtawk mah se second leg khelh a la ni dawn a, tun season-ah nomawi an beisei awmchhun a nih tawh avangin team pahnihten second leg-ah hnehna chan ngei an tum dawn. Second leg hi April 23, 2026-ah khelh leh a ni dawn.