Zanin dar 6:30-ah Chanmari FC Vs Sreenidi

Indian Football League-ah Chanmari FC-in round hmasa bera chak awmchhun Sreenidi Deccan an mikhual dawn a, zanin dar 6:30 hian RG Stadium, Mualpuiah inhmachhawn ang. Inkhel en man hi Rs 100 chauh a ni a, a hmuna Mizo club ṭawiawm thei lo tan DD Sports-ah en theih a ni a, YouTube channel aṭanga en duh pawhin Prasar Bharati Sports-ah en theih a ni bawk.

Team ṭha Sreenidi

Sreenidi Deccan hi Indian Super League khelh tuma ṭan la an ni a, tun season IFL-ah pawh champion rinkai an ni pha. Hyderabad club hian Mizo pali Brandon VL Remdika (Hunthar), Lalthankhuma (Cherhlun), Lalromawia (Samlukhai) leh Lalbiakliana (Aibawk) te an kawl a, player en châkawm vek an ni.

Match hmasa berah Sreenidi hian anmahni ang bawka team ṭha Diamond Harbour 1-0 in an hneh a, MPL best player ni tawh TK-a leh MPL chhul chhuak tho Romawia ten bul an ṭan a, bench aṭangin Aizawl FC aṭanga lar chhuak Brandon a lut bawk.

Hei chauh hi a ni lo a, Sreenidi hian foreigner paruk ngawt an kawl. Kolkata club lakah pawh Cameroonian forward Fabrice Kah-a'n goal awmchhun a khung. Mizo club tan hna a hautak dawn.

MPL champion Chanmari

Sreenidi hi ṭha viau pawh ni se an khingpui tur Chanmari FC hi MPL champion an ni a, RG Stadium-a inkhel tur a nih bawk avangin Mizo club hian Hyderabad club hi an hneh thei ang. Victor Lalbiakmawia hoin match hmasa berah Chanmariin Gokulam Kerala an chelh thei a, player tam zawkin inelna kalhmang an hre tawh a, pressure an nei tlem sawt ang.

Kerala club lakah coach Victor-a'n Mizo hlangin bul a ṭantir a, tun ṭumah erawh midfielder Christopher Kamei leh forward Jota te an lut nghal a nih pawhin thilmak a ni lo ang. Chanmari hi MPL-a champion puitu Rochhingpuia'n technical area-ah a ṭawiawm thei tawh dawn a, Chhinga (AFC B Licence) hian AFC A Licence a la neih loh avangin I League-ah head coach hna a la chelh thei lo.

Chanmariin Brazilian forward Jota bakah Kyle Degelman an neih belh a, Irish defender hian training a zawm tawh avangin squad-a a awm hmasa berah bul ṭan nghal thei ni bawk. Chutihrualin Mizo club tan Mizo player an pawiawh dawn a, mual sir lama che tla ṭhin Aron Vanlalrinchhana leh KC Malsawmsanga te danglamna thlentu an nei thei ang.

Mipui an pawimawh

Club budget aṭanga teh tur chu ni se Chanmari tan Sreenidi Deccan tluk rual a ni lo a, mah se football thiamna hmanga inbelh tur a nih avangin Mizo club hian player lak nana sum seng tam Hyderabad club hi an el tawk dawn.

RG Stadium-a khelh tur a nih avangin Chanmari hian Mizo mipui ṭawiawmna an mamawh a, kawr pawl nena inkhel entu an ṭhathnem a ṭul a, thawm an chhuah a ṭul bawk. Mipui an ṭhathnem phawt chuan Chanmari hi chak tura rinkai zawk an ni thei ang.