Spurs an tlawm leh tawh - tlak a hnai ta!

Kum 1977 hnua a vawi khat nan Tottenham Hotspur chu tla thei dinhmunah an ding mek a, season hmasa Europa League champion hian relegation zone an hlatna chu point khat chauh a ni ta.

Spurs hian Ningani zan khan an mikhual Crystal Palace chu 3-1 in an ngam lo a, league match 11 zet chu a zawnin an chak zo ta lo. London club hi 'Big Six' aṭangin 'Bottom Three' lama awm thei dinhmunah an ding mek e.

Tottenham tan Dominic Solanke chuan minute 34-na lekah goal hmahruai khung mah se, minute li hnuah Micky van de Ven chuan red card a hmu zui a, Spurs tan zan duhawm lo a inṭan nghal.

Palace tan Ismaila Sarr chuan goal hnih khung zuiin, Jorgen Strand Larsen-a'n goal khat a thawh bawk a, goal dang lut tawh loin, 3-1 in Palace an chak a, Spurs erawh Championship nen an inhnimhnai ta hle!

Hlauhthawnna

Tun hnai an result avangin Spurs an inringtawk lo tih a chiang a, inkhel ṭan aṭanga second 60-na lekah Palace tan Adam Wharton chuan chance a nei nghal - mahse, Spurss keeper Guglielmo Vicario chuan a lo dansak.

Spurs-in an nawr let zui a, mahse, Mathys Tel-a'n Palace keeper Dean Henderson a paltlang thei bik lo. Palace hian minute 30-naah goal hmahruai an khung emaw an ti a, Sarr-a shot chu Pedro Porro chuan dan a tumna lamah a tilut.

Mahse, video assistant referee inrawlh hnuah offside vanga pawm a ni lo a, Spurs lamin goal an khung ta thung. Archie Gray-a siamsak chu Solanke chuan goal-ah a chantir a, 1-0 a ni.

Spurs hlim chhung erawh rei lo tak a ni. Minute li hnu lawkah Van de Ven-a'n ball kal dan chhut sualin, Sarr a titlu zui a, red card a hmuh bakah penalty a chawi - Sarr-a'n penalty hmangin si phurh a sut.

A pawi zo ta

Player 10-in Spurs an khel a, 1-1 a ni bawk. Season tawp thleng atana lakluh coach Igor Tudor a hlauthawng a, wing back Souza leh forward Randal Kolo Muani la chhuakin, Conor Gallagher leh Yves Bissouma te minute 43-naah a luhtir zui.

Tudor-a'n point khat tal beiseiin substitution a siam tih a chiang a, mahse, first half hun pek belh chhungin Palace-in goal hnih dang an khung zui.

First half hun pek belh minute khatnaah Larsen a inlar a, Wharton-a ball pek duhthusam chu Vicario kap karah khungin, 2-1 in mikhual team hian hma an hruai zui.

Hun pek belh minute sarihnaah Wharton bawk inlarin, club liante chil tiputtu hian Sarr tan ball duhthusam bawk a pe a, Senegalese forward hian a hlah lo. Palace-in 3-1 in chawlhlawk an hmang a, Spurs fans sang telin stadium an chhuahsan.

Ta se...

3-1 a hnufual chungin Spurs-in chawlhlawk an hmang a, an tho leh tawh lo. EPL table-ah 16-na an ni mek a, relegation zone-a awm chin West Ham aia an sanna chu point khat chiah a ni.

League match 38 khelh tur aṭangin Spurs hian match 29 an khel tawh a, match kua chiah khelh tur a awm tawh tihna a ni - hengah hian Liverpool (away), Aston Villa (away) leh Chelsea (away) an la tum dawn!

Spurs hian Nilaini zanah Champions League round of 16 khel turin Atletico Madrid an mikhual zui dawn a, an hmabak a êng mawlh lo.

Premier League aṭanga tla thei dinhmunah Spurs an ding a, an tla a nih chuan Spurs-in season khata sum an hloh tur zat hi pound maktaduai 261 tling tura ngaih a ni.