Tudor-a'n Spurs a tudawl!

Tottenham Hotspur-in season hmasaah Ange Postecoglou hoin Europa League nomawi chawi mah se, league-ah beisei an phak loh avangin an coach hi an ban a, Brentford aṭangin Thomas Frank an la lut.

Mahse, Frank-a hnuaiah an beisei ang result an neih loh avangin Igor Tudor an la lut zui a, an tifuh chuang lo! Tudor hi a club awmna apiangah a hlawhtlin thu sawi tur awm lo mah se, Spurs hian lak chhan an nei.

Club a enkawl ṭantirhah result a nei ṭha ṭhin! Chu tê chu beisei chungin Spurs hian an la lut a, hei vang tak hian season tawp thleng atan bak contract pawh an ziahpui lo.

Mahse, Tudor-a hnuaiah Spurs-in match thum an khel tling ta a, an tlawm vek! Match thum chhung hian goal kua an chhuah a, red card pakhat an chawi tel a, goal thum chiah an khung bawk.

Tudor hian thutlukna mak tak tak a siam fo bawk. Palace laka an game a pawimawh tehlul nen, player man to pahnih Xavi Simons leh Conor Gallagher te chu bench-ah a dah a, top scorer Richarlison pawh bench lamah a awm!

January-a lakluh, kum 19 mi Souza chu EPL-ah a vawi khat nan bul a ṭantir mauh a, red card an hmuh ruala chi ai nghalin, Gallagher leh Yves Bissouma a luhtir zui a , defender panga leh central midfielder pathum an nei zui.

Chuti chung chuan goal hnih an chhuah leh ta tho a, Spurs an tlawm a, season tawp thleng atana lakluh coach lailawk hian season tawp pawh a ban thleng kher lo mai thei!