Newcastle khelmualah Man City

Nottingham Forest laka chak zo lo hlim Manchester City chu zanin dar 1:30 hian FA Cup khel turin an inlan dawn a, Newcastle United chu khualmualah an lenchilh dawn.

City hi an fixture a hautak rem rem hle - Premier League nomawi chawi tura an elpui Arsenal-in League one club Mansfield Town an hmachhawn dawn laiin Newcastle ber kher an chang a, Champions League-in a la hmuak zui!

Arsenal-in UCL last 16-ah Bayer Leverkusen an hmachhawn dawn a, City erawhin Real Madrid an chang thung! Pep Guardiola tan squad siksawi thiam a ṭul dawn.

City hian zaninah Magpies an lenchilh ang a, Nilaini zanah Madrid khawpui panin Real an lenchilh zui dawn a, Spanish coach tan a lu hai thlak khawp ang!

Newcastle hi team ṭha tak an nih rualin, tun season-a vawi li an intawn tawhah City hi vawi thum an chak - vawi khat erawh Magpies an chak ve thung.

Magpies hian an home-ah 2-1 in City hi an hneh a, City hian Etihad Stadium-ah 2-1 in an lo hneh let ve thung - he inkhel hi EPL ve ve a ni a, League Cup semifinal match hnihah City chak ve vein Newcastle an pet chhuak.

Newcastle tan tun hi Pep-a team laka phuba lakna hun ṭha a ni a, League Cup-a an beiseina tihtawpsaktu hi FA Cup aṭanga an pet chhuak thei a nih chuan an hlim khawp ang.

Hetihrual hian Newcastle tan hna a awlsam bik lo. Champions League last 16-ah Barcelona ber kher an chang a, Thawhlehni zanah La Liga champion an mikhual ang.

Pep-a leh Eddie Howe tan player rem thiam a ṭul ve ve dawn tihna a ni a, zanina team pahnih inhmachhawn tur hi en a châkawm ta hle.