Estevao tan chawimawina

Ningani zan khan London Football Awards sem niin, Chelsea rawlthar duhawm Estevao Willian chu Men’s Young Player of the Year atan thlan a ni a, mipa chawimawina dang zawng erawh Arsenal-in an hui vek thung.

Willian hi kum 18 mi chauh la niin, Chelsea-ah a season khatna chauh la hmang mah se, a tlangnel tawh hle. Blues forward hian tun season inelna hrang hrangah match 32 khelin goal sarih a khung tawh a, assist vawi thum a nei thung.

Hetihlai hian Premier League Player of the Year atan Arsenal midfielder Declan Rice chu thlan a ni a, Gunners coach Mikel Arteta chu Manager of the Year niin, David Raya pawh Goalkeeper of the Year-ah thlan a ni.

London club ho bik tana award hi siam a ni bawk a, Arsenal leh Chelsea-in award hi an thunun hneh hle - award sem chhuah 10 zinga pariat chu club pahnih hian an insem.

Chelsea hian zanin dar 11:15 hian FA Cup fifth round-ah Wrexham an lenchilh dawn. Championship club coach Phil Parkinson chuan, "Kan theihna zawng zawng hlanin kan khel dawn a, result chu kan hre mai ang.

"Hetihrual hian Chelsea hi kan zah a ngai. Tun hnai kum 10 chhungin, player lei nan tluklehdingawn chuang an seng alawm! Mahse, theihtawp chhuahin kan hmachhawn ang," a ti.

Chelsea hi Aston Villa laka 4-1 a chak hlim an ni a, Nilaini zanah Champions League round of 16 khel tura Paris Saint-Germain an mikhual zui dawn avangin coach Liam Rosenior-a'n zaninah player ṭhenkhat a hahdamtir a nih pawhin a mak lo ang.