Mi ngaihdana buai lo Saka

Arsenal forward Bukayo Saka chuan an club khelh dan chungchanga sawiselna an tawh ṭhin chu chhangletin, "Mi ngaihdanah kan buai lo," a ti a, chak a pawimawh ber thu a sawi.

Gunners hian an game khelh danah sawisel an tawk nasa a, set piece-a rilru an pe lutuk chuan football mawina a tihmelhem ni hialin ṭhenkhat chuan an sawi.

Liverpool boss Arne Slot chuan tun hnai khan EPL match a hmuhnawm tawk tawh loh thu a sawi chhuak a, Arsenal laka 1-0 a tlawm hlim Brighton & Hove Albion coach Fabian Hürzeler chuan, "Team pakhat chauhin football khelh kan tum," tiin inkhelh zawhah a sawi bawk.

Mahse, Saka chuan, "Mi thil sawiah kan buai lo. Social media-a an thil tarlan ka hmu lo a, ka chhiar hek lo. Kan tan hlawkna pakhatmah a awm lo bawk. Keini chuan kan tihdana hnehna chan zel hi kan duh a ni mai," a ti.

Saka chuan sawi zawmin, "Khawvela inkhel hmuhnawm ber kan chhawpchhuak emaw, set piece aṭangin kan khung emaw pawh ni se, sawi tur an nei zel tho ang. Season tawp kan hnaih telh telh a, chak zel kan tum," a ti a, mi dang ngaihdanah a buai lo.

Arsenal hian an league match hnuhnung bera Brighton an hneh avangin Premier League-a an hmahruaina an sawh nghet a, anmahni hnaih bertu Manchester City aiin point sarihin an sang tawh zawk - match khatin an khel tam thung.

Gunners hian vawiin tlai dar 5:45-ah FA Cup fifth round an khel dawn a, khualmualah League One club Mansfield Town an lenchilh dawn. Mikel Arteta-a tan player hahdamtirna hun ṭha a ni.