Kan phur tlang khawp mai - LZa

Mumbai City captain Lallianzuala Chhangte chuan an squad boruak a ṭhat thu sawiin, team pawh an inlungrual thu Vanglaini a hrilh - Mumbai hi tun season-a league match thum an khelh tawhah an la tlawm miah lo.

Mizo pali awmna Mumbai hian an match hmasa berah Chennaiyin chu 1-0 in an hneh a, a hnuah Kerala Blasters chu 1-0 thoa hnehin, NorthEast United chu 1-1 in an inhnehtawkpui bawk.

Lianzuala chuan, "Team inlungrualna a ṭha a, kan phur tlang bawk. Chutihrual chuan match tin hi a pawimawh vek si a, hliam neih palh a hlauhawm khawp mai," tiin Vanglaini a hrilh.

Tarlan tawh ṭhin angin tun season ISL-ah league match 13 chauh club pakhatin an khel dawn a, season tawpah point hmu sang ber an champion dawn - vawi khat chetsual a pawi thei.

Mumbai club tan Lianzuala'n season duhawm tak hmang mekin, league match thum a inlan tawhah goal hnih a khung tawh - Pathianni zan dar 7:30-ah hian Sporting Club Delhi an mikhual ang.

LZa captain-na hnuaia khel Mumbai hian Hmingthanmawia Ralte (Valpuia) an kawl a, season hmasa zawh hnua an lakluh Lalnuntluanga Bawitlung leh Zothanpuia te pawhin hmun pawimawh an chang nghal.

SC Delhi-ah hian tawnhriat nei ṭha Isaac Vanmalsawma bakah Ramhlunchhunga leh Augustine Lalrochana te chu Mizo awm ve an ni bawk.

Vawiin tlai dar 5:00-ah Mohammedan SC-in Bengaluru an hmachhawn dawn. Kolkata club tan Lalremsanga Fanai leh Lalthankima ten hmun pawimawh an chang a, Lalngaihsaka a lut ṭhin bawk - Mizo player dang panga an la awm!

Bengaluru tan Lalremtluanga Fanai (Tluangtea) chu player pawimawh a ni thung. Zanin dar 7:30-ah Kerala Blasters-in Chennaiyin an mikhual dawn bawk.

Blasters hian Freddy Lallawmawma leh R. Lalthanmawia an kawl a, Chennaiyin hian Laldinliana Renthlei, PC Laldinpuia leh Lalrinliana Hnamte (Terina) te an nei thung.