Zemabawk chesual nawn, TBL an tho

Mizoram Super League season 11 khelh mekah Zemabawk BC an la chak thei lo a, Ningani zan khan 84-78 in Mission Veng Hotshots an hneh lo.

Match hmasa lama chak lo Chhinga Veng BC-in 69-52 in Khatla TBL an hneh lo bawk a, match hnih khelh tawhah Zemabawk BC leh Chhinga Veng BC te an la tlawm ve ve.

Hotshots an huai

Tlai dar 5:30-a inkhel ni mah se inkhel entu an tam a, team pahnihte inkhel boruak a sang. MSV Hotshots tan an ram pawn player Darnell Johnson-a'n point 44 zet neiin a score hnem ber a, rebound vawi kua a la bawk. Johnson bakah Lalruatkima a khel ṭha a, point 16 neiin rebound vawi sarih a la a, assist panga nei bawkin player of the match-ah thlan a ni. Ruatkima hian player of the match vawi hnih a dawnna a ni tawh a, hnam dang karah a zam bik lo a, team tan a thawh hlawk hle.

Zemabawk tan inter state player Shashank J Rai (21), Lalropuia (20), K. Lalthianghlima (13) leh Carl James Snyder te khel chhe lo mah se an vanduai zan an tawng a, Hotshots lakah an tlawm.

Zemabawk hian March 9, Thawhṭanni zanah Khatla TBL an hmachhawn dawn a, an chesualk nawn a nih chuan semifinal khelh phak a har tawh dawn.

TBL an harh

Match hnuhnung zawkah Khatla TBL leh Chhinga Veng BC te an inkhel a, Khatla TBL-in hnehna changin tun season-a an vawi khat chakna a ni. TBL tan captain Vanlalṭhazuala a inlan thei tawh a, Ṭhazuala hian point 14 a nei nghal a, ram pawn player Makhel Ahkim Mitchell-a'n point 16 score-in rebound vawi 12 a la bawk.

Emmanuel VL Awmpuia'n point 13 score-in rebound vawi 10 a la a, double double siamin player of the match-ah thlan a ni. Match hmasa lamah Emmanuel hian point 31 zet a score tawh bawk.

Chhinga Veng BC tan Vanlalchhuanawma a khel ṭha a, point 15 lai nei mah se a teammate te puihna a dawng ṭha tawk lo. Vanlalchhuanawma chiah hi Chhinga Veng BC player zinga point 10 score tling awm chhun a ni.

Saron BC an hneh tawh loh avangin TBL an fimkhur a ngai tawh a, a vawi li nan champion an tum a nih chuan chetsual zeuh a pawi tawh dawn.