Pathianni zanah Milan derby awm dawn

Serie A hmahruaitu Inter Milan leh anmahni hnaih bertu, AC Milan te an inhmachhawn dawn a, team pahnihte inthlauhna hi point 10 lai ni mah se, match 11 khelh tur a la awm avangin Milan-in Inter an hneh ngei an tum dawn a, inkhel hmuhnawm a beisei ngam.

Tun season-ah Inter an che ṭha a, league-ah hmahruaitu niin lawi li chiah chak loh an nei a, vawi khat an khuingpuite an inhnehtawkpui tawh.

Inter tan tlarhma lamah Lautaro Martinez an innghahna a ni a, Argentine forward hian goal 14 khung tawhin ani aia khung hnem an awm lo. Mahse Martinez hi a chawn hliam vangin match hnuhnung berah a inlan tawh lo a, Milan lakah pawh a chawlh a rinawm zawk.

Kum 28 mi Martinez tel loin Inter tlarhma a hriam tawk lo a, Champions League-a Bodo/Glimt nen first leg an khelh ṭumin Martinez a inhliam a, second leg an khelh aṭangin inlan tawh lo.

Martinez awm lo mah se Pio Espoito, Marcus Thuram leh Ange-Yoan Bonny te an awm a, Martinez thlak zo turin rin har mah se Milan laka danglamna thlen turi theihna sang tak an nei. Martinez tih loh chu an dam kim thaw khat a, Milan hneh thei turin an ṭha tawk.

Hetihlai hian AC Milan-in Inter aiin inhliam an ngah a, Reuben Loftus-Cheek, Matteo Gabbia, Santi Gimenez leh West Ham aṭanga an haw Niclas Fullkrug te an inlan thei dawn lo.

Tlarhmaah Rafael Leao leh Christian Pulisc te an inkawp leh a rinawm a, forward pahnihte hi an dam ṭhat chuan hmatawng hlauhawm berte zinga mi an ni. Midfield-ah veteran player Luka Modric-a'n a ho theih dawn avangin inringtawk takin an khelh a rinawm.

Milan tan champion tur chuan an chet ṭhat bakah Inter chetsual hun an chan a ngai tawh a, match 11 khelh tur la awmah Massimiliano Allegri ten chak vek an tum tawh dawn a, Inter hneha bul ṭan an tum ang.

Cristian Chivu nauten point 10-in hmahruai fal tawh mah se inthlahdah an tum tawh dawn lo a, UCL aṭanga an tlak tawh avangin treble champion an beiseina a tawp a, champion an la inbeiseina Serie A leh Coppa Italia-ah champion ngei an tum dawn.