Hliam vangin Barca an buai

Spanish club lian Barcelona chu hliamin a tibuai a, player inhliam an ngah avangin coach Hansi Flick-a'n duhthlan tur a nei tlem sawt.

Barca hian thawhlehni zana Copa del Rey-a Atletico Madrid an hmachhawn ṭumin Jules Kounde leh Alejandro Balde te an inhliam a, Kounde phei chu minute 10-na lekah lakchhuah a ni. An hliam hi endik mek niin thla khat tal an chawlh a ngai dawn.

German coach Flick chuan,"Inhliam pahnih kan neih belh a, Kounde leh Balde hmain Frankie De Jong a inhliam avangin inhliam kar khat chhungin player pathum inhliam kan nei a, a lawmawm loh hle.

Hetiang thleng tawh lo tur hian medical staff leh fitness coach te nen kan inbiak ngei a ngai," a ti a, player inhliam an ngah avangin a lungawi lo.

Kounde, Balde leh De Jong te hma hian Barca hian inhliam an ngah tawh a, Andreas Christensen, Jofre Torrents, Toni Fernandez leh Gavi te chu hliam vanga chawl sa na ni. Catalan club hian zanin dar 1:30-ah Athletic Bilbao an lenchilh dawn a, player inhliam ten an result nghawng tir loh an tum dawn.

Barca hi an hmelmna Real Madrid nen point liin an inthlau mek a, Real hian nizan khan Celta Vigo an lenchilh a, an result a zirin an inthlauhna hi a danglam leh ang.