BCA dan tumtu Saron, Zemabawk tho dawn em?
Mizoram Super League season 11 khelh mekah champion lai Zarkawt BCA-in hnehna an la chang vek a, zanin dar 5:30-ah Saron BC-in an kaltluang lai tihtawp an tum dawn. Zemabawk BC leh Khatla TBL te zanin dar 8:30-ah inhmachhawn chhunzawm ang.
BCA an vul
Tun season-ah dan pangngaiin BCA an khel ṭha a, Mizo player ṭha an kawl hnem bakah foreigner leh inter state player-ten squad an tihchak belh a, champion nawn an tum hle.
BCA tan Zonunsanga leh Lalnunpuia Renthlei te chu an innghahna a ni a, Matthew Remtluanga Sailo a awm bawk avangin Mizo hlang pawhin an ṭha.
An ṭhatna belhchhah turin Nawaz Singh Panaich leh Caio Domingos Oliveira te an nei a, eng team tan pawh tum an châkawm loh a, Saron lakah hnehna chan leh ngei an tum dawn.
Saron tan season hmasaa Rookie of the League Lalmalsawma a khel ṭha chhunzawm zel a, Rinmuanpuia Chhangte leh J. Lalduhzuala te an match hnuhnung berah an khel ṭha a, BCA lakah an zam dawn lo.
Ram pawn player Hugo S Chotter a khel ṭha nghal a, ani bakah hian Samson Stephen Sandhu leh V Vishnu Prasad an nei bawk. Saron hian an match hmasa bera Khatla TBL an hneh thei a, BCA lakah hnehna chang turin inrintawkna an ngah sawt ang.
Champion tum ngam pahnih
Match hnuhnung zawkah Zemabawk BC leh Khatla TBL te an intawng dawn a, team pahnihte hi tun season-ah beisei an phak loh avangin hnehna chan ngei an tum dawn a, inkhel hmuhnawm a beisei ngam.
Zemabawk-in player ṭha kawl hnem mah se an khel fuh hleithei lo a, BCA leh Mission Veng Hotshots lakah an tlawm. Season hmasaah ṭha taka khelin season tharah champion sawi ri ngam mah se, an khelh tawh dawn thlirin champion an la hlat. TBL an hneh lo leh a nih ngat chuan semifinal khelh phak a harsa tawh dawn.
Hetihlai hian TBL an insiamṭha leh tawh a, match hmasa berah Saron BC hneh lo mah se Chhinga Veng BC an hneh leh tawh. TBL tan Emmanuel VL Awmpuia a hmuhnawm a, captain Vanlalṭhazuala leh Makhel Ahkim Mitchell te an khel thei tawh bawk a, Zemabawk laka hnehna chang turin theihtawp an chhuah leh ang.