Aizawl FC chakna goal mawi 3

Indian Football League-ah Aizawl FC-in club ṭha zia an lantir a, Rajasthan United lakah goal mawi bik vawi thum khungin Rajasthan United 3-1 in an hneh. Coach R. Lalruatfela enkawl team hian match hnihah point li hmuin league hmahruaitu an ni a, game mawi an khelh tel dawn bawk avangin a chung bera awm hi an phu hle.

Zirtawpni zan inkhelah Khawbel tlangval Zomuansanga leh Baktawng tlangval Vincent Lalduhawma ten mawi zetin an tauh lut a, Farkawn tlangval Lalhriatpuia'n hun tawp hma hretin kawh zetin a pet lut bawk. Rajasthan-in Pedro Astray Lopez hmangin goal khung mah se chak phu zawk Mizo club-in hnehna an chang.

Game mawi chu

Aizawl FC-in Mizo hlangin bul an ṭan a, khualmuala Namdhari an hmachhawn ṭuma bul ṭantute bawkin bul an ṭan. Inkhelh hmain coach R-a'n khelh dan nghet an neih thu a sawi a, khelmual chhungah a takin a lang. Mizo player-ten ball an keng ngam a, inkhel an thunun hle.

Mizo club-in goal an khung hmaa minute 11-naah Zomuana'n a tauh lut. Goal hmasa ber luh theih nan Vincent-a'n a cross ṭha a, Khawbel tlangvalin goal kilah tak a tauh lut. Aizawl FC-in inkhel an thunun zui a, goal dang pawh khung belh tur an ni.

Box chhungah right back Laldawngzuala an titlu a, penalty ngei tura ngaih ni mah se referee-in tlu derah ngaiin yellow card a pe daih. Referee thutluknain Mizo club a pui lo a, an buai lai takin Rajasthan-in Pedro Astray Lopez hmangin minute 31-naah siphurh an sut.

Goal mawi dang

Aizawl FC-in goal chhuah mah se an talbuai phah lo a, an insiamṭha lehnghal. First half-ah goal a luh belh lo a, minute 71-naah Mizo club-in goal an khung. Kolasib tlangval Lalrempuia'n a ke vei lamin ṭha zetin a vawrhluh a, goal hmahruai siamtu Vincent-a'n sang taka zuangin a tauh lut. Goal class bik a ni a, team goal dik tak a ni.

Rajasthan lamin corner kick an hmu hnem a, Mizo hlanga khel Aizawl FC tlarhnung a phui tlat avangin an hmang ṭangkai thei lo. Hun tawp lamah Rajasthan-in nawr ve bawk mah se goal hlauhawm an nei hran lo.

Hun tawp dawn hnaiah Farkawn tlangval Hriata a rawn lut a, hun khawhral nan chauha lut a ni lo tih a rawn lantir. Yard 30 vel zet aṭangin Hriata hian kawh zetin a pet a, a kawh em avangin Rajasthan keeper Bhabindra Malla-a'n a dang thei lo. Aizawl FC-in an phu angin 3-1 in hnehna an chang.