Risk lak a ngai - Liam Rosenior

Chelsea head coach Liam Rosenior chuan squad a siksawi nasat avangin sawiselna tawk mah se, "Risk lak a ngai ve ṭhin alawm," a ti - Chelsea hian Inrinni zan khan FA Cup fifth round-ah Wrexham chu 4-2 in an hneh a, fixture tawt em em nei chungin extra time an khelh a ngai.

Championship club laka extra time khelh avangin mi tam takin Rosenior-a squad siksawi nasat chu an sawisel zui. Kum 41 mi coach hian Wrexham lakah Aston Villa laka 4-1 a chak team aṭangin player pakua ngawt a thlak!

Cole Palmer, Moises Caicedo leh Enzo Fernandez te chu squad-ah pawh awm loin, Reece James chu bench-ah a ṭhu tluan a, Marc Cucurella leh Joao Pedro te chu bench aṭangin an lut thung.

Wrexham lakah Blues hian goal pawh an chhuah hmasa zawk a, Sam Smith chuan minute 18-na lekah goal hmahruai a khung - minute 40-naah Blues hian own goal hmangin an chhanglet.

Alejandro Garnacho-a goal khung tur chu Wrexham midfielder George Thomason chuan lo dangin, ball per hian an keeper Arthur Okonkwo a per a, an lamah a lut daih!

Wrexham hian second half-ah Callum Doyle hmangin hma hruai nawn mah se, Josh Acheampong-a'n Blues tan si phurh a sut ve leh a, hun pek belhah Wrexham midfielder George Dobson chu Garnacho laka a chet dan avangin hnawhchhuah zui a ni.

Extra time khelh a ni a, player tam zawka khel Blues tan Garnacho chuan minute 96-naah an hmahruaina goal a khung - 120+5 ah Joao Pedro chuan khung ve leh bawkin, 4-2 in Blues an chak.

Wrexham tan khati taka Chelsea an khel tawk kha lawmna tur a ni a, hetihrual hian substitute Lewis Brunt-a si phurh sutna goal nia an ngaih, video assistant referee-in offside vanga a pawm lo erawh an ui vawng vawng ang.

Blues-in player siksawi chungin hnehna an chang a, Rosenior-a'n Chelsea a enkawl hnuah match tina player panga zel thlak ang a ni - keeper pahnih Robert Sanchez leh Filip Jorgensen pawh a inrin chhawk!

Rosenior chuan, "Ka first 11 emaw 12 emaw chauh hian kan thlen duhna min hruai thleng dawn lo. Kan beisei thleng tur hian squad-a player zawng zawng hi an hriam a, an inpeih at reng a ngai a ni.

"Ka first 11 regular-te kha zaninah hmang ila, kan chak ngei ngei dawn tihna a ni chuang lo. Tun hnai thla 18 chhunga kan match neih hi khawvelah a tam ber hial ang chu!

"Chuvang chuan player zawng zawng ka rin a ngai a, zaninah pawh ka rinna chu result hmangin an tihlawhtling a ni," a ti a, a squad siksawi chungchang a sawifiah.

Chelsea hian Nilaini zan dar 1:30-ah Champions League round of 16 khel turin Paris Saint-Germain an lenchilh zui dawn a ni.