Nomawi pali beiseitu Arsenal

Arsenal tan nomawi pali beiseina a nung chhunzawm zel - Gunners hian FA Cup quarterfinal lut turin Mansfield Town chu 2-1 in an hneh a, League One club lakah Noni Madueke leh Eberechi Eze ten goal khat ve ve an khung.

Mikel Arteta-a'n match khelh tur an ngah hre rengin squad a siksawi a, Mansfield laka bul ṭan zingah kum 16 mi pahnih Marli Salmon leh Max Dowman te an tel - Dowman hi Arsenal tana FA Cup-a bul ṭan thei naupang ber niin, kum 16 leh ni 66 mi a ni.

Dowman a khel ṭha a, Madueke-a'n goal hmahruai a khung hmain vawi hnih ngawt chance duhawm a nei hial. Minute 41-naah Madueke-a'n goal khung zuiin, second half ṭan aṭanga minute lina lekah Mansfield hian Will Evans hmangin an chhanglet.

Mahse, Arsenal tan Eze chuan khung ve lehin, Gunners chak nan a tawk. Arteta naute hi an beisei anga awlsam erawhin an chak bik lo - League One club tan Rhys Oates leh Louis Reed ten chance duhawm an nei ve ve a, mahse, goalkeeper Kepa Arrizabalaga-a'n a dansak.

Hetihlai hian Tyler Roberts chuan uiawm takin chance a hlah bawk. Mansfield hian first half chhung ringawtin Arsenal lakah vawi 11 shot an nei a, April 2022 hnua Gunners-in first half chhunga inelna hrang hranga shot an hmachhawn hnem ber a tling!

Mahse, League One lama point nga chauha relegation zone hlattu Mansfield tan Arsenal an la sang hret a, Gunners an chak ta tho.

Premier League hmahruaitu Arsenal hian League Cup-ah final an lut tawh a, FA Cup-ah a thiam pariatah an tel leh ta a, Nilaini zan Champions League last 16-ah Bayer Leverkusen an lenchilh dawn bawk - nomawi pali an la beisei zel e.