Real an vannei, Barca chakna Yamal
La Liga hmahruaitu nih inchuh boruak a sang zel a, Zirtawpni zan khan Real Madrid chuan 2-1 in Celta Vigo an hneh hram a, Aurelien Tchouameni leh Federico Valverde ten goal an khung. Inrinni zanah hmahruaitu Barcelona chuan Lamine Yamal-a goal hmangin Athletic Bilbao an hneh bawk.
Team vannei Real
Balaídos Stadium, Vigo-a inkhelah Real-in goal an khung hma a, minute 11-na lekah Arda Guler-a ball pek chu Tchouameni-a'n a khung a, a team hma hruaipui.
Mualneitu Celta Vigo an zam bik lo a, minute 25-naah Borja Iglesias-a'n a pet goal a, an siphurh a sut. Real tana goal khungtu Tchouameni-a'n Iglesias a veng ṭha tawk lo.
Los Blancos tan Vinicius Jr, César Palacios leh Antonio Rudiger ten an chance neih an hlah vek a, goal dang an khung thei lawk lo.
Team pahnihte an inhnehtawk dawna a lan laiin injury time-ah Valverde a inlar a, a shot kawh tak chu Celta Vigo defender Marcos Alonso-a'n lo dang pialin goal-ah a lut a, keeper Ionuț Radu tan dan ngaihna a awm tawh lo. Hun a tawp zui nghal avangin vannei takin Real an chak.
Champion zia ?
San Mames, Bilbao-a inkhelah Bilbao an hlauhawm hmasa zawk a, inkhel an ṭan chiah tihin Barca defender Joao Cancelo-a'n an lamah a tilut teuh hle a, goal bar a per hlauh.
Bilbao an vanduai chhunzawm a, Inaki Williams leh Oihan Sancet ten an hun ṭha neih a chhawr ṭangkai thei lo a, Barca keeper Joan Garcia a che ṭha ve bawk.
Mikhual team Barca-in ball an chang hnem a, an mikhualna ramah an zam lo. Mahse Barca-in chance an insiam hleithei lo a, inkhelh chhung zawngin goal zawnah vawi hnih chiah an pe thei.
Barca an vanduai reng lo a, an hmelma Real an chak tih an hriat avangin chak loh an duh lo. Minute 68-naah rawlthar duhawm Yamal-a'n mawi takin a pet kual lut a, goal awmchhun khungin Barca chak nan a tawk.
La Liga match 11 khelh tur a la awm a, Barca leh Real te point li chauha an inthlauh avangin champion tur a la chiang lo a, team pahnihte hi Champions League-ah an la dam ve ve a, match an ngah dawn avangin champion inchuh boruak a sang dawn chauh.