Napoli chak zanah KDB a lo kir

Inrinni zan Serie A inkhelah Napoli tan Kevin De Bruyne a inlan leh thei tawh a, Belgian midfielder kir zanah Torino 2-1 in an hneh. Napoli tan Alisson Santos leh Eljif Elmas ten goal an khung a, Torino tan Cesare Casadei a goal khung chu an mualpho ti ziaawmtu chauh a ni.

Diego Armando Maradona Stadium-a inkhelah mualneituin inkhel an thunun zawk a, minute sarihna lekah Santos-a'n box pawn aṭangin tawih takin goal kilah a pet goal a, Napoli-in hma an hruai hma hle.

Sporting Lisbon aṭanga an hawh Santos a hmuhnawm zui a, chance hlauhawm a siam chhunzawm a, mahse a vanneih zan a ni lo. Santos bakah Matteo Politano-a'n freekick aṭangin chance a nei a, mahse Torino keeper Alberto Paleari-a'n a dang.

Minute 68-naah Napoli-in goal an khung leh a, Elmas-an hnai tak aṭangin a pet goal a, an hmahruaina a belhchhah a, Napoli an phur hle.

Mikhual team tan Casadei-a'n minute 87-naah an siphur a sut ṭhen a, Torino phur viau mah se hunin a daih tawh lo a, goal dang an khung belh theih tawh loh avangin Napoli an chak.

Napoli tan minute 78-naah De Bruyne a lut a, minute 11 chhung a khel hman. A khelh chhungin danglamna siam lo mah se Napoli fans te tan midfielder thiam bik rawn kir hi lawmna tham a tling.

Nikum October khan De Bruyne hian a malpuiah hliam a tuar a, zai a ngai hial. Thla li zet a chawlh hnuah a inlan leh thei tawh a, Napoli tan a aia thu lawmawm a awm bik lo ang. Kum 34-mi De Bruyne hi a inhliam nawn leh a nih loh chuan kumin June-a khelh ṭan tur World Cup-ah Belgium innghahna tur a ni.

Tun season-ah hliam vangin Napoli an buai a, Serie A champion an beiseina a tawp tawh bakah, Champions League leh Coppa Italia aṭangin an tla tawh a, season thara UCL khelh phak chu an beisei awmchhun a ni tawh a, an beiseina tihlawhtling turin De Bruyne a pawimawh dawn.