Chanmari an vannei, Chhinga Veng chak ve ta

Mizoram Super League khelh mekah Mission Veng Hotshots chuan hneh loh an tawng ta a, Inrinni zan khan Chanmari BC chu 80-79 in an hneh lo a, a vawi khat nan an tlawm. Hetihlai hian Chhinga Veng BC-in a vawi khat nan hnehna an chang a, Tuikual South BC chu 106-75 in an hneh.

Inkhel hmuhnawm

Inkhel hmasa zawkah Chanmari an vannei a, Chanmari hian match hmasaah Zarkawt BCA 104-79 a hneh lo zo hlim an ni a, Hotshots lakah chak loh chhunzawm an duh loh avangin huaisen takin an khel a, an huaisen rah an hmu.

Inkhel hmuhnawm takah Chanmari tan JP Walker-a'n point 25 neiin a score hnem ber a, rebound vawi 16 a la bawk. Mizo player zingah Lalnunsanga a langsar a, Nuna hian point 19 score-in player of the match-ah thlan a ni a, Chanmari chak nan a thawh hlawk hle.

Hotshots tan Darnell Johnson-a'n point 40 zet a score a, Moses Zoremmawia (13) leh K. Lalfakzuala (12) te khel ṭha mah se an vanduai zan an tawng a, point khat lekin Chanmari an hneh lo.

Chhinga Veng an tho

Match hnih an tlawm hnuah Chhinga veng an tho chhuak ve ta. Tuikual South BC an hneh a, an inthlauhna hi point 30 zet a tling.

Chhinga Veng tan player paruk zetin point 10 an score tling a, point 16 leh assist 10 neitu Lalhriatzuala chu player of the match-ah thlan a ni.

Tuikual South tan Lalbiakkima'n point 21 neiin a ngah ber a, C. Chawnglianzela (13), Samuel Lalhruaitluanga (11) leh K. Liandinga te khel ṭha viau mah se Chhinga Veng laka chak nan a tawk zo lo.

Tun season-ah Tuikual South hian match thum khel tawhin an tlawm vek a, semifinal khel pha turin an hmabak a ko tawh hle. Tuikual South hiam March 10, Thawhlehni dar 8:30-ah Chanmari an hmachhawn leh ang.