Bayern an sang zel

German champion Bayern Munich an chak zel a, Zirtawpni zan khan 4-1 in Borussia Monchengladbach an hneh a, champion turin kawng dik an zawh zel. Bayern tan Luis Diaz, Konrad Laimer, Jamal Musiala leh Nicolas Jackson ten goal khat ṭheuh an khung a, Monchengladbach tan Wael Mohya goal khung chu scoreline cheimawitu chauh a ni.

Allianz Arena-a inkhelah mualneitu an chungnung zawk a, chance pawh an insiam nghal. Minute 33-naah goal khung ṭanin Diaz-a'n an hmahruaina goal a hlap lut a, Colombian forward hian tun season-ah goal 14 a khungna chiah a ni.

First half hun pek belhah Bayern-in counter attack hmangin an nawr a, Laimer-a'n keeper chiah a hmachhawn hnuah a pet goal a, an hmahruaina a belhchhah.

Second half-ah Bayern bawk an hlauhawm a, minute 55-naah Jackson a tihtluk avangin Rocco Reitz-a'n penalty leh red card a chawi kawp. Musiala-a'n penalty aṭangin an goal thumna a khung a, goal hnih phur sa Monchengladbach-in goal dang an chhuah leh a, kim loa an khelh avangin thawhchhuah ngaihna a awm tawh lo.

Minute 79-naah Lennart Karl-a cross chu hnai tak aṭangin Jackson-a'n a khung a, Monchengladbach keeper Moritz Nicolas-a tan dan ngaihna a awm tawh lo.

Hun tawp hma hretin mikhual team tan Mohya-a'n chiang takin a pet goal mah se, an mualpho lutuk tur hliahkhuhna chauh a tling a, harsatna tawk loin Bayern an chak.

Bayern hian point 66 hmuin hmahruaitu an nih chhunzawm zel a, match kua khelh tur la awmah anmahni hnaih bertu Borussia Dortmund aiin point 11 in an sang tawh a, an chesual viau a nih loh chuan an champion a rinawm tawh.

Bavarians tan an goal khung khawl Harry Kane a inlan lo a, English forward Kane hi kar hmasaa Dortmund nen an inkhel zawh khan a chawnah hliam a tuar a, a aiah Nicolas Jackson a lut.

Bayern coach Vincent Kompany chuan Kane hi a hliama na lo niin a sawi a, March 10, Thawhlehni zana Atalanta nen Champions League playoff an khelh hunah a inlan a beisei bawk.