MPL8 champion Aizawl FC

Mizoram Premier League Season 8-ah league round-a pakhatna Aizawl FC chuan final-ah Electric Veng FC 2-0 a hnehin an champion.

I League club hi MPL final vawi nga an khelh tawhah vawi li champion tawhin Mizoram Premier League-a record nei ṭha ber an ni. Inrinni zan RG Stadium, Mualpuia final hmuhnawm takah Aizawl FC tan Isak Vanlalruatfela leh F. Lalremsanga ten goal an khung a; Electric Vengin a chhanletna an hmuh loh avangin coach Lalsangzuala Hmar chu final-ah kum zawnin a vanduai.

Aizawl FC coach Standly Rosario-a'n a naute a hre chiang tawh a, chu aia pawimawh chu a khingpuite a bel tawh. Coach tawnhriat nei ṭha hian chetsual thei a ni tih hriain semifinal second leg ang thoin Lalhmangaihkima aiah William Lalnunfela bul a ṭantir a, captain Alfred Kemah Jaryan chu midfield tichak turin a pawt let nawn.

Electric Veng coach Lalsangzuala Hmar erawhin hrem vangin a player Lalrammawia a chhawr thei lo. Dam chian loh vangin David Lalchhuanawma bench-ah a awm a, chutih rualin Salem Veng tlangval David leh bench-a a ṭhutpui Jacob Lalrawngbawla ten tun season-ah bul an ṭan tam tawk lo.

Sanga'n final boruak sangah kum naupang zawk leh tawnrhiat nei tlem zawk chungah rinna a nghat a, hma tawngah Lalruatfela Zote tih loh chu tawnhriat nei ṭha lo rawlthar rual an ni.

Aizawl FC-in Standly Rosario hnuaiah nasa takin hma an sawn tih a lang a, an khelh dan an bel bawk. Electric Veng pawhin Sanga hoin tum dan an nei a, an tawnhriat neih dan a inthlau deuh tih loah chuan inbuatsaihna an nei ṭha tih a chiang.

MPL7 best defender PC Laldinpuia hoin Electric Veng tlarhnung a khawng ṭha viau a, amaherawhchu an tihfuh tawk loh hmasa berah goal an chhuah. Minute 19-naah William-a'n EFC left back Lalnunmawia a bum hnuin Isak-a tan a siamsak a, Thingsulthliah tlangval hian a hun thawl neih chu a thiamna lantirna hun atan hmangin goal hmahruai a khung. 

Dinglama khel thiam zawk Mawitea'n vei lama awm a harsat a, Aizawl FC hlauhawm chhunzawm mah se Electric Veng pawhin chance ṭha an nei ve tho. EFC midfielder Zawnhmingthanga Hmar freekick ṭha zet chu Aizawl FC keeper Lalremruata'n a dansak a, Fela Zote ball fing tak chu Vanlallawmtluanga tan goal khung ngeina tur ni mah se Arema a inrawlh hman.

Second half-ah Aizawl FC game a nghet sawt a, captain Dinpuia venna karah Remsanga tal pûtin Lengpui tlangvalin minute 62-naah goal pawimawh a khung. I League club-in goal hnih a khung hnuin Electric Veng beiseina a bo ṭan a, Aizawl FC goal-ah an hlauhawm chhunzawm bawk.

Sanga'n bench aṭangin David leh Jacob te luhtir mah se danglamna an thlen lo a, Standly erawhin midfield thuam chakin forward William aiah Hmangaihkima a luhtir a, goal tam taka chak kher a tum lo. AFC-in goal an khung belh tawh lo a, 2-0 in hnehna an chang.

Aizawl FC coach Standly Rosario chuan, "MPL-a kan duh ber nomawi chu kan chawi ta. Tuna kan hmachhawp chu I League a ni a, theihtawp kan chhuah chhunzawm ang," tiin Vanglaini a hrilh. Standly chuan sawi chhunzawmin, "Ka naute hian nasa takin hma an sawn a, nomawi hi kan phu a, MPL mimal lawmman lak vek hi kan phu ka ti. Aizawl FC ṭantute leh club hruaitute chungah min ṭawiawmna ṭha tak avangin lawm takzet a ni," tiin a sawi.

Aizawl FC-in semifinal second leg-a player lutte bawk an ring nawn. Electric Veng FC erawhin Lalrammawia hrem vangin an chhawr thei lo a, Lalruatfela Zote-in tlarhmaah bul a ṭan. Midfield-ah Vanlalremkima aiah Vanlallawmtluanga a lut thung.

Aizawl FC (4-4-2) : Arema; Zohera, Rosanga, Kassaga, Tea; Isak, Paul, Alfred, Chhara; William (Hmangaihkima 73'), Remsanga (PC-a 90')

Electric Veng FC (4-1-4-1) : Muansanga; Rorela, Dinpuia, Buanga; Engmawia; Chhunga, Lawmtluanga (David 73'), Thanga, VL Lawma (Jacob 53'); Fela Zote (HP-a 80')

Champion    Aizawl FC    Rs 6,00,000

Pahnihna    Electric Veng FC    Rs 3,30,000

Pathumna    Mizoram Police    Rs 2,20,000

Pathumna    Chhinga Veng FC    Rs 2,20,000

Pangana    Chanmari FC    Rs 1,35,000

Parukna    Chawnpui FC    Rs 1,10,000

Pasarihna    FC Venghnuai    Rs 85,000

Pariatna    Ramhlun North FC    Rs 60,000

Fair Play    Chawnpui FC    Rs 20,000