Real-in La Liga table chung ber an luah

Barcelona chak loh thu hria a inkhel Real Madrid-in an hun ṭha neih bawhpelh an duh lo a, Pathianni zan khan an mikhualna ramah Real Valladolid chu 1-0 in an hneh. 

Real tan Nacho chuan he inkhela goal awmchhun hi a khung a, Toni Kroos-a 'cross' aṭanga ball kal chu minute 78-naah a tauh lut - Spanish defender tan kum hnih hnua La Liga-a goal a khung leh hmasak ber a ni. 

Brazilian midfielder Casemiro chuan Real tan goal hmahruai a khung niah a inngai a, mahse video assistant rawn a nih hnuah offside vangin a goal hi pawm a ni lo. Real-in hnehna an chan avangin table chung berah an awm a, Inrinni zana Valencia ngam lotu Barcelona aia an sanna chu point thum a ni. 

Barcelona-in an buai kum an tawng mek a, coach thar Quique Setien hnuaia insiamrem an tum lai tak a ni - Real hian hei hi remchangah an la thei a nih chuan tun season-ah champion turin chance ṭha tak an nei. 

Real lawmna belhchhah turin Atletico Madrid chuan hnehna an chang zo bik lo a, an mikhual Leganes chu 0-0 in an inhnehtawkpui. Diego Simeone-a naute hi pangana niin top four huang pawnah an awm tawh a, champion ni loin season thara Champions League khelh phak chu an buaina tur zawk a ni ta.