Bayern chakna Coutinho-a hattrick

Philippe Coutinho-a goal thum khung hmangin Bayern Munich chuan Werder Bremen 6-1 in an sawp a, inkhel dangah Borussia Dortmund tan Jadon Sancho vul chhunzawm zelin match ruk chhung a zawnin goal a khung ta.

Inrinni zan Bundesliga inkhelah Bayern tan hian Coutinho-a'n hattrick a siam bakah striker hriam Robert Lewandowski chuan goal hnih a khung a, tun hnaia harhtharna chang Thomas Muller chuan an goal hnuhnung ber a thawh ve bawk.

Brazil international Coutinho-a'n Allianz Arena-a awm ngheh a duh thu a sawi hnu lawkah fans lawmna a siam a, German champion hian Barcelona aṭanga a ngheta lei an duh ngei pawh a rinawm ta hle. Nidang ang bawkin Bayern mawina chu Lewandowski a ni. Poland international hian tun season-a match 23 a khelh tawhah goal 29 teh meuh a khung ta a, a club hi pasarihna aṭangin palinaah a kaisanpui.

Inkhel dangah Dortmund chuan Mainz 4-0 in an sawp; Marco Reus, Sancho, Thorgan Hazard leh Nico Schulz te chuan goal khat ṭheuh khungin nuamsa takin hnehna an chang. Kum 19 mi Sancho-a'n tun hnaiah a zawnin match ruk chhung goal a khung ta a, German football inelna sang berah hian goal 21 a nei der tawh. Kum 20 tlin hmaa goal khung hnem pahnih Horst Koppel (24 goals) leh Kai Havertz te a hnaih tawh hle.

England international chuan, "Mimal thawh a ni lo, tlarhma a awm pathum - kei, Thorgan leh Marco te kan inthlawp ṭha em em a, training-na hmuna kan zir anga kan khelh chhuah theih hi chuan thil hi a awlsam ṭhin a ni," a ti. Sancho hian season kal laiah goal 11 a khung tawh bakah assist vawi 12 a  nei tawh. Bayern tan hian Sarpreet Singh chu bench aṭanga luhtir a ni a, kum 20 mi New Zealand international hi Indian thisen kai Bundesliga-a inlan hmasa ber a ni.