Port Vale-in Black Cats barakhaih

Pathianni zan khan FA Cup fifth round khelh chhunzawm a ni a, beisei loh result a thleng - League One club Port Vale chuan 1-0 in Sunderland an pet chhuak a, Southampton-in Premier League club Fulham chu 1-0 in an pet chhuak bawk!

Port Vale-in an khelmualah season duhawm tak hmangtu Sunderland an mikhual a, League One table mawngphah luahtu tan EPL club lakah beisei a sang lo. Mahse, minute 28-naah Ben Waine chuan inkhela goal awmchhun khungin, 1-0 in a team a chakpui daih!

Sunderland-in tum loh deuhin FA Cup an mangṭha a, Port Vale erawhin kum 1954 hnua a vawi khat nan FA Cup quarterfinal an lut ta thung - an tan chuan mumang ram a ni zel tawh.

Hetihlai hian Fulham pawh an chak zo bik lo a, Championship club Southampton an ngam lo - mikhual Saints hian hun pek belh minute khatnaah Ross Stewart-a penalty hmangin goal awmchhun an khung a, Fulham tan a na vawng vawng ang.

EPL club Fulham hian minute 19-naah goal an khung a, sawisel theih takin pawmsak an ni lo. Daniel Peretz-a goal kick chuan Ryan Manning-a hnung perin, a per lehlam hi Rodrigo Muniz ke bulah a tla a, Muniz-a'n goal-ah a khung.

Mahse, goal a luh hma hian referee Jarred Gillett-a'n hamrik a ham tawh - Peretz-a goal kick hma hian ball hi a lir niah a ngai a, football danah pet ṭhat tur a nih avangin a ham hman.

EPL club pahnih chak loh zanah Leeds United erawh an chak a, 3-0 in Norwich City an hneh - Leeds tan Sean Longstaff, Gabriel Gudmundsson leh Joel Piroe ten goal khat ṭheuh an khung a, kum 2003 hnua a vawi khat nan Leeds-in FA Cup quarterfinal an lut.